Watapana. Jaargang 2

[p. 21]

Un biaha mas ortografia di Papiamento

Den e revista antijano ‘RUKU’ di januari 1970 nos a sera konosí ku e ortografía, ku Drs. Raúl Römer a presentá den un disertashón, tení na Aruba, na luna di augustus 1968.

‘RUKU’ ta komentá ku ‘é tin hopi apresyo pa e proposishón di e ortografía akí di Sr. Römer, manera el a ser kompilá for di un konferensha na Ruba pa Sr. Ito Tromp, anke ku e por a tene según nos algu mas kwenta ku etimología’.

E revista akí, dirigí pa Frank Martinus, ta haja un ortografía pa Papiamento nesesario, pero é tá kontra e ‘manera diktatorial’, ku menernan di skol (revista ‘CACHU’) ta pidi pa gobièrno aseptá e ortografía di Römer.

Anke nos no ta haja ku un ortografía mester tene kwenta ku etimología (estudio di origen di palabranan), nos tambe ta di opinión, ku no por kore tuma un desishón asina pa loko i aseptá un ortografía ku solamente un persona a introdusí. Ta lógiko i natural ku mester konsultá otro expertonan riba tereno di Papiamento.

A puntra lingwístanan manera Antoine J. Maduro, Enrique Goilo, Luis H. Daal, Jules de Palm kaba, kiko nan ta pensa di e ortografía di Raúl Römer?

I kon ta para ku tur e persónanan, ku día-adén día-afó ta dediká nan esfwèrso na kreashón di literatura di Antillas?

Ja sa kaba, kiko Pierre Lauffer, Elis Juliana, Hubert Booi, Guillermo Rosario, May Henriquez, etc. ta opiná en kwanto e ortografía akí?

Antó, ta kón Shon Mener di skol (‘CACHU’) por exigí pa aseptá e ortografía?

Ortografía tá un asunto di NOS tur, no tá kos di un persona só, sino é ta toka henter nos pweblo.

Tá p'esei, tambe, día ku Luis H. Daal a tuma e inisiativa pa lanta un komishón (‘Fo'i hopi, un só’) pa studia posibilidatnan di un ortografía uniforme pa Papiamento, el a kòrda ku tin más hende, ku ta papia i skirbi e idioma akí. A pensa riba héndenan manera Antoine Maduro, Guillermo Rosario, May Henriquez, Pierre Lauffer, Enrique Goilo, Nicolás Piña, Tirso Sprockel, Tuyuchi Leito, Elis Juliana i hopi mas hende kapábel pa tuma parti den e ‘Komishón’. E nòmber ta papia pa su mes: ‘fo'i hopi, un só’. Ta esei ta e manera di traha den un pweblo demókratiko!

Na aña 1950 ‘SIMADAN’ a publiká un ensajo chikito di W.M. Hoyer, ku ta trata riba ortografía di Papiamento.

E òwtor ta exponé ku ‘ortografía empleá na composición di e obranan (publiká na Corsow na 1849, 1851 i 1853) tabatá puramente fonética, tumando como base alfabeto holandés; palabranan tabatá skirbí na manera cu un holandes por a leza: ‘awoor’, ‘bees’, ‘miera’, ‘moetsjoe’, ‘poeëblo’, etc.

Hoyer ta splika, ku ‘ta preferíbel nos adoptá un ortografía ku tin pa base alfabeto spañó, komo ta di e idioma aki lo mester tuma e palabranan ku falta na Papiamento’. Den Hoyer su manera di pensa nos ta nota un sorto di kontradikshón, pasobra mientras é ta abogá pa un eskritura fonétiko, é ta sugerí pa sigui alfabèt spañó, ku no ta reflehá pronunsiashón di e idioma ei fonétikamente.

E zonido, o mihó bisá, e fonema K (velar oklusivo sordo), por ehèmpel, ta wórdu

[p. 22]

representá na spañó tin biaha pa e signo C (casa), otro biaha pa e signo QU (queso) i algún biaha pa e signo K (kilo).

Mientras e signo K ta wòrdu uzá internashonalmente pa representá fonétikamente e fonema velar oklusivo sordo (zonido K), spañó ta uza tres diferente signo pa reflehá. e mes fonema ei.

Asina ta, si ke uza un sistema fonétiko, no por tuma komo base alfabèt spañó.

Loke mester hasi ta, buska un sistema alfabétiko adekwado, adaptá na pronunsiashón di Papiamento mes.

Na página 19 di su ‘Rapòrt final’ e komishón ‘Fo'i hopi, un só’ ta papia di e propio personalidat di kada idioma. Ata 'ki loke mester tene kwenta kuné: Papiamento tambe tin su propio personalidat!

Nos a nutri nos lenga ku palabranan prestá fo'i otro idioma (un fenómeno normal den evolushón di tur idioma), pero nan a bira Papiamento, pasobra nos a adaptá nan na NOS manera di pronunsiá. Si spañó ta bisa ‘kabesa’ i ta skirbi ‘cabeza’, su kwenta!

Si na Kastilia nan ta pronunsiá ‘kombersathión’ (TH inglés), mientras ta ‘conversación’ nan ta skirbi, nan asunto!

Si inglés ke bisa ‘nèvermaind’ i ta skirbi ‘never mind’, no ta nos problema.

Papiamento ta bisa ‘kabés’, ‘kombersashón’ (SH inglés), ‘lebumai’ i ta skirbi e palabranan manera ta pronunsiá nan. I no manera algún hende: ‘cabez’, ‘conversación’, ‘never mind’.

Un ortografía no ta pa mustra di ki idioma un palabra ta derivá, sino simplemente pa mustra ta kon mester pronunsiá e palabra.

Maske kon halto hende ke bula pa bisa ku mester skirbi ‘stoel’ i ‘boeki’, pasobra ta di hulandés e palabranan ei tá tumá, nos ta sigui skirbi trankilo ‘stul’ i ‘buki’, meskós ku nos ta skirbi ‘Aruba’, ‘lus’, ‘krus’, ‘sambuja’ ku ‘U’.

Asina tambe nos ta skirbi ‘kuki’, ‘sunchi’, in secula seculorum....

Ora nos tende, por ehèmpel, e fonema S (frikativo sordo), no tin mester di puntra ta di unda e palabra ta bini. Ta skirbi ‘S’ i tur kenshi a kaba. P'esei: ‘sapato’, ‘serbés’, ‘sikología’, ‘sinsero’ etc.

Loke sí nos no ta komprondé ta e manera ku e ‘komishón’ ta proponé pa skirbi ‘papia’, ‘balia’, ‘serio’, ‘rèi’, ‘rèina’, ‘kaimán’, ‘tamarèin’, etc.

Nos sa ku e ‘i’ den e palabranan aki no ta un vokal, sino un semi-konsonante (papia) i un semi-vokal (rèina). Sin embargo, nos no ta haja nesesario pa hinka sabiduria den un ortografía i skirbi ‘papja’, ‘balja’, ‘serjo’, ‘rèj’, ‘rèjna’, ‘kajmán’, ‘tamarèjn’, etc. Niún hende lo n'pensa pa pronunsiá ‘papia’, ‘balia’, ku tres sílaba (pa-pi-a, ba-li-a).

Ora ku mester pronunsiá e ‘i’, (den kombinashón ku un otro vokal) komo un vokal kompleto, anto masha fásil por pone un asento riba dje, manera e ‘komishón’ tambe ta hasi.

Ehèmpel: ortografía, patía, alegría, puítu, ruína, maíshi, etc.

[p. 23]

E ortografía di R. Römer ta kompliká e asunto un poko más i ke skirbi ‘papya’, ‘balya’, etc.

E introdukshón di un ‘y’ (yod) pa mustra ku nos tin keber ku un semi konsonante o semi-vokal no ta parse nos un ‘simplifikashón, sino un ‘komplikashón’.

Si nos no ta uza un taipráiter (kwanto hende ta skirbi karta na taipráiter?), anto e skirbimento di ‘myentras’, ‘obligatoryo’, ‘silensyo’, ‘yubyoso’ ku ‘y’ ta kansá nos más ku e ta fasilitá nos trabòw, pasobra en bes di skirbi un ‘i’ só, mester pega un ‘j’ su tras tambe (‘y’ ta kasi un kombinashón di ‘i’ ku ‘j’).

Loke nos mester ta un ortografía fásil i práktiko, i no un sistema sientífiko i difísil djis pa saka pikete....

E introdukshón di un ‘w’ (wau) pa reflehá e zonido di ‘u’ den diptongo (‘despwés’, ‘kwantu’) sí tin motibo!

Ban purba aklará e punto aki. Nos ta nota, ku den e alfabèt di Raúl Römer tin dos diferente ‘g’, esta uno pa e fonema velar oklusivo sonoro (por ehèmpel ‘gala’) i otro pa e fonema velar frikativo sordo (‘giro’). (RUKU, pág. 25).

Uno ta skirbí normal i e otro kursivo. Pero ta kon nos mester hasi distinshón ora nos ta skirbiendo na man?

Den su ‘Muchila’ nos ta ripará ku Hubert Booi ta distinguí un i otro pa medio di un strepi, ku é ta pone bòw di e ‘g’ frikativo sordo. (‘gala’, pero ‘giro’)

Ta pakiko hende ta kere ku tur kos ‘nobo’ mester ta bon i loke ta ‘biew’ mester ta malo?

Nos no por sigui hasi uzo di e ‘invento’ di spañó, ku ta djis pega un ‘u’ tras di e ‘g’ pa hasiele bira oklusivo sonoro dilanti di ‘e’ o di ‘i’? (manera ‘Fo'i hopi, un só’ tambe ta proponé?).

No ta parse nos nada práktiko, si kada bes ku nos ke skirbi un ‘g’ oklusivo sonoro, mester ‘manda e mashín bèk,’ pa pone un strepi bòw di e ‘g’ ku nos a kaba di taip. Masha trankilo asina nos por skirbi: ‘gigante’, ‘exagerá’, ‘privilegio’, pero ‘sigui’, ‘guera’, ‘portugués’, etc.

Awor ta lanta e pregunta, ta kon mester skirbi na papiamentu e palabranan, ku na spañó ta: ‘vergüenza’, ‘ungüento’, ‘lingüista’, etc., ja ku nos ta uza e signo ‘ü’ kaba pa representá na papiamentu e zonido (fonema) hulandés den palabranan manera ‘stuur’, ‘huur’, ‘zuur’; na papiamentu: ‘stür’ ‘hür’, ‘zür’. Awor nos tin un motibu pa akudí na fonétika: no kore kambia si n'tin mester!!!

I si nos disidí di skirbi ‘bèrgwensa’, ‘ungwento’, ‘lingwista’, etc. nos por sigui konsekwentemente i skirbi tambe: ‘kwida’, ‘mwébel’, ‘kaswal’, ‘swèrtè’, ‘rewnión’, ‘kòwsa’, ‘òwtor’, etc.

Ta más ku klaro, ku konsekwensha tambe tin un limíte. Pa nos parti, no tin mester di jega asina lew i skirbi ‘Beneswela’ i ‘Djamajka’ en bes di ‘Venezuela’ i ‘Jamaica’. Konsekwensha no tin mester di tira nos den sirko tampoko pa hunga pajaso!

‘RUKU’ ta opservá, además, ku ‘e reglanan di aksento aki ta parse nos demasiado

[p. 24]

sientífiko di manera ku pa hasi un bon uso di aksento un hende ku kier skirbi papyamento lo mester ta kasi un lingwista e mes i esaki nunka no por ta intenshón di un ortografía’ (papiando riba ortografía di R. Römer).

Anke nos sa, ku un hende no tin mester di ta lingwista pa por ripará riba kwa sílaba di un palabra e asento ta kai, nos ta haja, ku un ortografía, berdat, no mester kompliká, sino simplifiká i fasilitá nos trabòw.

Ta pa e motibo ei nos no ta mira ningún forsa konvinsente den un dj ei réglanan di e ortografía di R. Römer:

‘Palabranan di dos o más sílaba ku tin prominensya riba último sílaba, i ku ta terminá ku “-er” i “-el”, sí ta haya asento agudo skirbí’ (RUKU, jan. 1970, pág. 25). Maske kwanto nos lubidá di pone asento ariba e ‘e’ di ‘haber’, ‘poder’, ‘plaser’, ‘papel’, tóh nos ta sigui pronunsiá e palabranan aki normalmente, esta ku asento ariba deláster sílaba. E ‘regla’ akí ta pará den nos kaminda i pa nos no trompiká, laga nos skep'é.

Otro kos tá e aséntonan pa kambia un vokal, o mihó bisá pa mustra ku mester artikulá sierto vokal más habrí.

Ehèmpel: ‘sker’ tá un verbo (hulandés: ‘scheuren’) i ‘skèr’ tá un sustantivo. E promé ‘e’ ta será i e di dos ta habrí.

E palabra ‘stof’ ku vokal será tin otro nifikashón ku ‘stóf’ ku vokal habrí. Si nos pronunsiá e palabra ‘lechi’ ku un ‘e’ habrí, nos ta papia di enteramente otro kos ku ‘lechi’ ku ‘e’ será.

Pa hasi un bon distinshón entre un i otro nos por pone un ‘accent grave’ (') ariba e vokal habrí.

Asina tambe nos ta pone un ‘accent grave’ ariba e ‘u’ di e palabranan hulandés manera ‘brug’, ‘suf’, ‘bus’, ‘kruk’, pa distinguié di e ‘u’ di ‘skur’, ‘tur’, ‘Aruba’, etc. Nos no tin mester di ta lingwista, esei sigur ku nò!

Pero mester realisá, ku e ortografía di ‘Fo'i hopi, un so’ i esún di R. Römer a ser presentá pa juda nos jega na un manera uniforme di skirbi Papiamento.

Komentárionan emoshonal manera: ‘Pero nan a kambia i hasi Papiamento mahós!’ i otro manera ‘Ja nos tin ortografía kaba!’ ta disparati i ko'i mucha chikito.

Laga nos sera nos kurasón un poko mas den nos man i habri nos sintí pa enfrentá e trabòwnan akí krítikamente.

Día ku un di nan ser aseptá (no tin gran diferensha entre nan dos) anto tur doló di kabés a kaba....

Ta klaro, awó falta pa nos siñ'ele: ‘La buena ortografía, como la buena pronunciación, es un conjunto de hábitos que no se adquieren más que con el ejercicio’ (Gili Gaya).

‘RUKU’ ta termina su komentario ku: ‘Nos Antijanonan mester stop di stima nos idioma i nos tera ku boka so poko i kuminsá hasi algu pa nan....’

‘Fo'i hopi, un só’ a dediká su trabòw i su esfwèrso pa reuní kasi tur djaluna, fo'i luna di mèi te oktober di 1960, kompilá su ‘Rapòrt final’ i present'é na gobièrno

[p. 25]

na aña 1961 (kasi 9 aña pasá!).

Gobièrno Sentral (Fòrti) i gobièrno insular (Skalo), Staten, Huvùrnùr, Obispo, Raad van Advies, Presidènt di Hòf, tur e 33 héndenan ku a ser invitá pa forma e ‘komishón’, etc., tur a haja un ehemplar di e rapòrt akí.... nwebe aña pasá, según presidente di e Komishón a informá nos.

E Komishón akí a rekomendá pa gobièrno sentral forma un komishón pa studia e rapòrt ei i uz'é komo ‘werkstuk’ pa jega na algo definitivo. El a sugerí nwebe nòmber konkreto di antijánonan, ku a okupá nan ku asunto di papiamentu!

Awe nos ta bibando den 1970 i papiamtu no tin su ortografía ofisial aínda. Pweblo no sa ta kon ta skirbi su mes idioma.

Ta kende mester kuminsá hasi algo????

Den su resolushón di desèmber último pasa, ‘Fundashón Identidat Antillano’ ta pidi òwtoridatnan atenshón pa algún punto di suma importansha. Entre otro nan ta exponé, ku ‘het meest belangrijke expressie-middel voor Aruba, Bonaire en Curaçao de Papiamentse taal is. Het is daarom van belang dat de studie van het Papiamento bevorderd wordt en het proces ter aanvaarding van een officiële ortografie versneld wordt’.

E ‘proces’ ta bai kumpli su di dos lustro....

No ta birando tempo, Grandinan? Aseptá pa kaba, pero demokrátikamente!

H. Habibe.