Watapana. Jaargang 1

(1968-1969)– [tijdschrift] Watapana– rechtenstatus



[pagina 3]
Si nos alma skucha Si nos alma skucha... kwántu kos l'é n'komprendé; kwántu pensamentu tristu, sin speransa i sin lus, lo no para bira fwente di legría, lus i fe ku ta konsolá i duna bida. Den nos móndinan privá di bèrdè, lo nos mira man di Dios i su poder ora awa kai i solo para pinta anglo riba kweru di nos tera maltratá... Kón manera un artista, lagadishi ku su rabu kje bin' toka un serenada riba wiri di un blachi ku a seka bòw 'i un palu; òf zonido den djanochi di mil kriki ku ta parse stèm di Dios den skuridat, pa nos sâ ku, asta, ej tin bejesa, si nos skucha; den kantika'i jonkumán di nos bjentu 'i ost baldadi, ku ta hunga kuri-kwé ku su mes den un mondi 'i datu o den palu di maíshi ora nochi ta baj sera, o maínta ora un tòw di para para blèr na kant'i dam unda nan ta jega bon temprán pa bin bebe, baña i bati bleki, promé solo bolbe sali. I ora núbjanan aja 'riba blanku-blanku, sin purá, krusa un shelu blòw i kla, tá manera man di Dios ku ta skirbi su grandesa déntr di nos kurasón, si nos alma sâ di skucha... Luis H. Daal