De oudnederlandse (oudnederfrankische) psalmenfragmenten

Psalm LXXII

So guot Israel got (thên) thia mit rehtin sint hertin!
Mîna eft nâio irruorda sint fuoti, nâio ûtgotona sint ganga mîna;
UUanda ik andoda ouir unrehta, fritho sundigero gesiande.
UUanda ne ist scauuuonga dôdi iro, in festi an slege iro;
An arbêithe manno ne sint, in mit mannon ne sulun befilloda uuerthan.
Bethiu hatta sia ouirmuodi, bethecoda sint mit unrehte in mit ummilda iro.
Forthfuor also uan smeri unreht iro, fuoron an gerin hertin;
Thâhton in sprâcon archhêide, unreht an hôi sprâcon;
Sia satton an himele munt iro, in tunga iro lêit an ertha.
Bethiu bekêret uuerthe folc mîn hiera, in daga folla fundona (uuerthunt) an im.
In quâthon: huo uuêit got? in of ist uuîsduom an hôe?
Ecco sia sundiga in thîonda an uueroldi hatton rîcduom.
In quad ik: geuuisso sunder saca gerihtoda ik herta mîn, in uuosc under unsculdigin hendi mîna.
In ik uuas befillit allan dag, in kestigata mîna an morgan.

[p. 44]

15.

Of ic quad: tellon sal ik sô; ecco cunni kindo thînro uuithercôs ik.

16.

Ik uuânda dat ik kende that: arbêit ist furi mi,

17.

Untes ic gange an hêilicduome godis in farnimi an letiston thingon iro.

18.

Nouan-thog thuro lôsinga gesattos im, thu faruurpi sia, so sia irhauona uuerthin.

19.

Huo gedâna uurthun an testôrnussi! Sân tefuoron, farduruon thuro unreht sîn.

20.

Also slâp upstândiro, hêrro, an burge thînro bilithe iro te nieuuehte bringon salt.

21.

UUanda an flammun ist herta mîn, in lendin mîn bekêrda uuirthun,

22.

In ik te nieuuehte brâht bin in ik ne uuista; also fê gedân bin mit thi.

23.

In ik io mit thi; thu hattos geuualt forthron mînro,

24.

In an uuillin thînin lêidos-tu mi, in mit guolichêide antfiengi mi.

25.

UUad geuuisso mi ist an himele? In fan thi uuad uuolda ik ouir erthon?

26.

Tefuor flêisc mîn in herta mîn: got lîuis mînes, in dêil mîn got an êuuon.

27.

UUanda ecco, thia firrodon sig fan thi, farfaran sulun; thu farteridos alla thia scêthint aua thi.

28.

Mi eft te cleuone gode guot ist, te setene an hêrrin gode tohopa mîn, that ik cunde alla predigunga thîna an portun dohteron Syon.