De oudnederlandse (oudnederfrankische) psalmenfragmenten

Psalm LXXI

Got, duom thîn cunig gif, in rehtnussi thîn kindi cuningis, te duomene folc thîn an rehtnussi, in arma thîna an duome.
Antfangin berga fritho folki, in huuela rehtnussi.

[p. 42]

4.

Irduomon (sal) arma folkes in behaldona duon sal kint armero in genitheron sal....¹⁾.

5.

In fuluuonon sal mit sunnun in êr mâno, an cunni cunno.

6.

Nithestîgon sal also regan an uelli, in also dropon driepinda ouir ertha.

7.

UUahson sal an dagon sînon rehtnussi in genuhti frithis, untes genuman uuerthe mâno.

8.

In uualdon sal fan sêuue untes te sêuue, in fan fluode untes tote gemerke ringis erthono.

9.

Furi imo fallon sulun Môra, in fiunda sîna ertha leccon sulun.

10.

Cuninga Tharsis in âlende geuon bringon sulun, cuninga Arabum in Saba geua bringon sulun;

11.

In bedon sulun imo alla cuninga, alla thiade thienon sulun imo,

12.

UUanda generon sal armin fan geuuelde, in armin themo ne uuas hulpere.

13.

Genâthon sal armin in hulpilôsin, in sêlon armero behaldana duon sal;

14.

Fan prismon in fan unrehte irlôson sal sêlon iro, in êrlic namo iro furi imo.

15.

In libbon sal, in geuon sal imo fan goldi Arabie, in sprecon sulun fan imo io, allan dag geuuigen sulun imo.

16.

UUesen sal ueste an erthon an hôi berge, ouirhauan uuirthit ouir Libanum fruht sîn, in blôion sulun fan burg also houuue erthon.

17.

Sî namo sîn geuuîgit an uueroldi, êr sunnun thurouuanot namo sîn: in geuuîit (uuerthin) an imo al cunni erthon, alla thiadi gemikilon sulun imo.

1) De vertaling van lat. calumniatorem ontbreekt in het hs.

[p. 43]

18.

Geuuîit hêrro got Israelis, thie duot uunder êino,

19.

In geuuîit ist namo mancrefti sîn an êuuon, in irfullit uuirthit mancrefte sînro alla ertha. Geuuerthe, geuuerthe.