De oudnederlandse (oudnederfrankische) psalmenfragmenten

Psalm LXX

An thi, hêrro, getrûoda; ne uuerthe ic gescendit an êuuon. An rehnussi thînin genere mi in irlósi mi; nêige mi ôra thîn in behalt mi!
Sîs mi an got bescirmere in an stede fastero, that-tu behaldan mi duos, uuanda festi mîn in uuitherfluht mîn bis-tu.
Got mîn, genere mi fan hendi sundigis in fan hendi uuither uuitut uuirkindes in unrehtis!
UUanda thu bist gethult mîn, hêrro; hêrro, tohopa mîn fan iuginde mînro.
An thi gefestit bin fan bûke, fan uuambun muodir mînro thu bist bescirmere mîn.
An thi sang mîn io; also furitêkin gedân bin managun, in thu hulpere stark.
Irfullit uuerthe munt mîn mit loue, that ik singi guolichêide thîn, allan dag mikile thîn.
Ne faruuirp mi an tîde eldi; so teferit craft mîn, ne farlât-tu mi!
UUanda quâthun fiunda mîn mi, in thia huodun sêla mîna rât uuarhton an êin,
Quethinde: got farliet imo, êhtit sîn in fangit imo, uuanda ne ist thia generi.

[p. 41]

12.

Got, ne ferri thu fan mi! Got mîn, an hulpon gescauuuo!

13.

Gescendida uuerthin in tefarin afterthinsinde sêlon mînro, bethecoda uuerthin mit scamon in mit unêron thia suocunt uuel mi.

14.

Ic eft getrûon sal in getôcon ouer al lof thîn.

15.

Munt mîn cundon sal rehnussi thîn, allan dag sâlda thîn, uuanda ne becanda buocstaf.

16.

Ingân sal an geuuelde hêrrin; hêrro, gehuggon sal rehtnussi thîn êines.

17.

Got, thu lêrdos mi fan iuginde mînro, in untes nû farcundon sal ic uundir thîn.

18.

In untes an eldi in ur-eldi, got, ne farlât-tu mi, untes ic cundi arm thînin cunni allin thia te cumene ist,

19.

Geuualt thîn in rehnussi thîn, got, untes an hôista, thia thu dêdi mikila. Got, uuie ist gelîc thi?

20.

So mikila ôgodos-tu mi arbêitha managa in uuela! In bekêrit gequiccodos mi, in fan afgrundi erthon eft uuitherebrâhtos mi;

21.

Thu gemanohfaldidos mikile thîne, in bekêrt gitrôstos mi.

22.

UUanda in ic begian sal thi an uaton salmis uuârhêide thîna, got; singon sal ic thi an citharon, hêiligo Israel.

23.

Mendun sulun lepora mîna, so ik singon thi, in sêla mîn thia thu irlôstos.

24.

Nouan in tunga mîn thencon sal rehtnussi thîn, so sia gescendida in gescamoda uuârun thia suocunt uuel mi.