Logo DBNL
De oudnederlandse (oudnederfrankische) psalmenfragmenten (1957)

De oudnederlandse (oudnederfrankische) psalmenfragmenten

(1957)–Anoniem Wachtendonckse Psalmen–rechtenstatus Auteursrechtelijk beschermd

Vorige Volgende

Psalm LXVIII

2.
Behaldan mi duo, got, uuanda ingiengon uuatir untes te sêlon mînro.
3.
Gestekit bin ic an lêimo diupi, in ne ist geuuesannussi; ic quam an diopi sêuues, inde geuuidere besenkida mi.
4.
Ic aruidoda ruopinde, hêisa gidâna uurthun kelon mîna, tefuorun ôugon mîn, (so) sal ic gitrûon an gode mînin.
5.
Gimanochfoldoda sint ouir locka hôuidis mînis thia hatodon mi thankis; gesterkoda sint thia hêftidon mi fiunda mîni mit unrehte; thia ic ne nam, thuo fargalt.
6.
Got, thu uuêist unuuiti mîne in misdâdi mîna fan thi ne sint beholona.
7.
Ne scaman sig an mi thia bîdint thi, hêrro, hêrro crefte! Ne uuerthin gesceindit ouir mi thia suocunt thi, got Israhelis!
8.
UUanda thuro thi tholoda ik bismer, bethecoda scama antscêini mîn;
9.
Elelendig gedân bin bruothron mînon in fremithi kindon muodir mînro.
10.
UUanda ando hûses thînis at mi, in bismer lastrindero thi fielon ouir mi.
11.
In ic thecoda an fastingon sêla mîna, in gidân ist an bismer mi,
12.
In gesatta uuât mîn te héron, in gedân bin im an spelle.
13.
Angegin mi sprâcon thia sâton an portun, in an mi sungun thia druncun uuîn.
14.
Ic geuuisso gebet mîn te thi, hêrro; tît uuala te lîkene, got! An menege ginâthon thînro gehôri mi, an uuârhêide sâldun thînro!
15.
Genere mi fan horouue, that ne ic innestecke; genere mi fan thên thia hatodon mi in fan diopithon uuatiro.
16.
Ne mi besenki geuuidere uuateres, nohne farsuelge mi diupi, nohne antlûke ouir mi putte munt iro.
17.
Gihôri mi, hêrro, uuanda guot ist ginâtha thîna; aftir menege ginâthono thînro scauuuo an mi,
18.
In ne kêre antscêine thîn fan knapin thînin, uuanda ic geuuîtenot uuirthon: sniumo gihôri mi!
19.
Thenke sêlon mînro, in genere sia; thuro fiunda mîna irlôsi mi.
20.
Thu uuêst laster mînin in scama mîna in unêra mîna; an geginuuirdi thînro sint alla thia uuîtonont mi.
21.
Lasteris bêid herta mîn in armuodis: in ik bêid thia samon gedruouit uuirthi, in ne uuas; the getrôstoda, in ne fant.
22.
In gâuon an muos mîn galla, in an thurste mînin drenkedon mi mit etige.
23.
UUerthe disc iro furi im an stricke, in an uuitherlônon in an besuîchêide!
24.
Duncla uuerthin ôugon iro that sia ne gesian, in rukgi iro io an-crumbe!
25.
Ûtguit ouir sia âbulge thîna, in hêitmuode âbulge thînro befangi sia!
26.
UUerthe uuonunga iro uuosti, in an selethon iro ne sîe thia uuone.
27.
UUanda thana thu sluogi êhtidon sia, in ouer sêr uundeno mînro geôcodon.
28.
Gesette unreht ouir unreht iro, in ne gangint an rehtnussi thîn.
29.
Fardiligot uuerthin fan buoke libbendero, in mit rehtlicon ne uuerthon gescriuona.
30.
Ic bin arm in tregehaft; sâlda thîn, got, antfieng mi.
31.
Louon sal ic namo godis mit sange; in gemikolon sal ic imo an loue.
32.
In gelîcon sal it gode ouir calf nûuui, horin forthbrenginde in clâuuon.
33.
Gesian arma in blîthin; suokit got in libbun (sal) sêla iuuua.
34.
UUanda gehôrda arma hêrro, in gibundana sîna ne faruuirp.
35.
Louin imo himela in ertha, sêu in alla criepinda an im.
36.
UUanda got behaldan duon sal Syon, in gestiftoda sulun uuerthun burge Iudae; in uuanun sulun thâr, in mit erui geuuinnon sulun sia;
37.
In cunni scalco sînro nieton sal sia, in thia minnunt namo sînan uuonon sulun an imo.

Vorige Volgende

Over dit hoofdstuk/artikel

titels