De oudnederlandse (oudnederfrankische) psalmenfragmenten

Psalm LXVII

Upstandi got, in testôrda uuerthin fiunda sîna, in flient thia hatodon imo fan antscêine sînin.
Also teferit rôuc, tefarin; also flûtit uuahs fan antscêine fûiris, sô farfarin sundiga fan antscêine godis.
In rehtlica gôuma uuirkint in mendint an antscêine godis, in gelieue im an blîthone.
Singet gode, lof quethet namon sînin, uueg uuirkit imo, thia upstêig ouir nithegang: hêrro namo imo.
Mendit an geginuuirdi sînro; gidruoueda uuerthint fan antscêine sînro, fadera uuêisono in scepenin uuidouuano.
Got an stede hêilegoro sînro, got thie anuuanon duot êinis sidin an hûse, thie ûtlêidende (ist) bebundona an sterke, also thia thia uuitherstrîdunt, thia uuonunt an grauon.
Got, so thu giengi an geginuuirdi folkis thînis, so thu thurolithi an uûstinon,
Ertha irruort ist, geuuisso himela druppon fan antscêine godis Sinai, fan antscêine godis Israelis.
Regin uuilligin ûtscêithon saltu, got, erui thînin, in ummahtig ist, thu geuuisso thurofremidos sia.
Quicca fê thîna uuonun sulun an iro; thu geruuidos an suoti thînro (armin), got.
Hêrro giuit uuort predicondon mit crefte mikiliro.
Cunig crefte lieuis lieuis, in scôni hûsis te dêiline girôuui.
Of gi slâpit under mitdon samnungun, fetheron

[p. 36]

14.

dûuon fersiluerdero, in aftrista rugis iro an blêike goldis.

15.

So undirscêithit himilisco cuninga ouir sia, fan snéue uuîta sulun uuerthun an Selmon.

16.

Berg godis berg fêit, berg sueuot, berg fêitit.

17.

Beuuie uuânit gi berga gequâhlit? Berg an themo uuala gelîcad ist gode te uuonone an imo; geuuisso hêrro uuonon sal an ende.

18.

Rêdiuuagon godes mit tên thûsint manohfalt, thûsint blîthendero; hêrro an im an Sinai an hêiligon.

19.

Upstigis an hôi, nâmi hafta, antfiengi geua an mannon, geuuisso ungelôuuinda an te uuonene hêrro got.

20.

Geuuîet hêrro an dag daga-uuelikis! gisunda farth duon sal uns got sâldano unsero.

21.

Got unser got behaldana duonda, in hêrrin hêrrin ûtfarth dôdis.

22.

Nouan-thoh got tebrecan sal hôuit fiundo sînro, scêithlon lockis umbigangindero an misdâdin iro.

23.

Quad hêrro: fan Basan bekêran sal ic, kêron an dûpi sêuues,

24.

That nat uuerthe fuot thîn an bluode, tunga hundo thînro fan fiundun fan imo.

25.

Gesâgon ganga thîna, got, ganga godes mînis, cuningis mînis thie ist an hêiligin.

26.

Furiquâmon furista gefuogeda singindon an midton thierno timparinno.

27.

An samnungun geuuîet gode hêrren, fan brunnon Israelis.

28.

Thâr Beniamin iungelig an muodis ouirferdi, furista Iuda lêidera iro, furista Zabulon, furista Nephtalim.

29.

Gebuit, got, crefti thînro; gefesti that, got, that-tu uuorhtus an unsig.

[p. 37]

30.

Fan duome thînin an Ierusalem thi offron sulun cuninga geuon.

31.

Refang dier riedis: samnunga stiero an cûon folco, that sia ûtscêithin thia thia gecoroda sint mit siluer.

32.

Testôri thiadi thia uuîga uuilunt: cumun sulun bodon fan Aegipto, Aethiopia furicumun sal heinde iro gode.

33.

Rîki erthon, singit gode, singit hêrrin,

34.

Sangit gode, thia upstîgit ouir himel himeles te ôsterhaluon.

35.

Ecco, geuon sal stimma sînro stemma crefte. Geuet guolichêide gode ouir Israhel, mikili sîn in craft sîn an uulcun.

36.

Uundirlic got an hêiligon sînin, got Israelis hie geuon sal craft in sterke folkis sînis. Geuuîit got!