De oudnederlandse (oudnederfrankische) psalmenfragmenten

Psalm LXIV

Thi timit lof, got, an Syon, in thi uuirthit gegeuan gehêita an Hierusalem.
Gehôri gebet mîn! te thi alla-flêisc cuman sal.
UUort unrehtero creftih uuâren ouir uns, in sundon unsen thu genâthon(salt).
Sâlig thana thu gecuri in genâmi! uuonon sal an frîthouon thînin. Irfullida uuerthun (uui) an guode hûses thînis.
Hêilig ist duom thîn, uunderlic an rehte. Gehôri unsig, got, neriando unsa, tohopa allero endo erthon, in an sêuui ferro;
Geruuindi berga an crefte thînro, gegurdit mit geuuelde.

[p. 33]

8.

Thia gidruouis diopi sêuuis, lût fluodi sînro.

9.

Gedruoueda uuerthunt thiadi, in forhton sulun thia uuonont an gemerke fan têignon thînon; ûtferthi morganis in âuondis saltu gelieuon.

10.

Thu uuîsodos erthon in fardrenkedos sia; thu gemanohfaldedos te gerîksini sia. Fluot godis irfullit ist mit uuateron. Thu geruuedos muos iro, uuanda sô ist geruuinga iro.

11.

Beke iro fardrenkende gemanohfaldos cunni iro; an dropon iro blîthon sal barinda.

12.

Quethon saltu coronam iâris guodi thînro, in felt thîna irfullot uuerthunt mit genuhte;

13.

Fêita sulun uuerthun scônitha uuostinnon, in mendisle huuela begurdida uuerthunt.

14.

Anaclêda (sint) uuithera scâpo, in dale thîon sulun mit fruhti; ruopon salun, geuuisso lof quethan salun.