De oudnederlandse (oudnederfrankische) psalmenfragmenten

Psalm LXV

Singit gode, al ertha, lof quethet namon sînin; geuet guolikhêide loui sînin.
Quethit gode: so eiselika thing sint uuerk thîna, hêrro! An menigi crefti thînro liegon sulun thi fiunda thîna.
Al ertha bede thi in singe thi, lof quethe namin thînin.
Cumit in gesiet uuerk godis, egislikis an râdon ouir kint manno,
Thie kierit sêo an thurrithon; an fluode ouirlîthon solun mit fuoti. Thâ sulun uuir blîthan an imo,
Thie uualdonde ist an crefte sînro te êuuon. Ôugun sîna ouir thiadi scauuont: thia uuitherstrîdunt, ne uuerthint irhauan an sig seluan.

[p. 34]

8.

Geuuîet, thiadi, got unsan, inde gehôrda duot stemma louis sînis,

9.

Thie satta sêla mîna te lîue, in ne gaf an giruornussi fuoti mîne.

10.

UUanda becorodos uns, got, mit fûire uns irsuohtos, also man irsuokit siluer.

11.

Thu leidos unsig an stricke, sattos aruit an ruggi unsin, gesattos man ouir hôuit unsa;

12.

UUi lithon thuro fûir in thuro uuatir, in brâhtos unsig an cuolithon.

13.

Gân sal ic an hûse thînin an offringon,

14.

Geuan sal ik thi gehêita mîna, thia undirsciethon lepora mîna, in sprac munt mîn an aruithi mîna.

15.

Offringa luttira offran sal ic thi mit brunni uuithero, offran sal ic thi ohsson mit buckin.

16.

Cumit, gehôrit, in tellon sal ic, alla thia forhtit gode, huo deda sêla mîna.

17.

Te imo mundi mînin riep, in mendida undir tungon mînro.

18.

Unreht of gisag an hertin mînin, ne sal gehôran hêrro. Bethiu gehôrda got in thâhta stemmon bedon mînro.

19.

Geuuîgit got, thie ne faruuarp gebet mîn in ginâtha sîna fan mi.