De oudnederlandse (oudnederfrankische) psalmenfragmenten

Psalm LXIII

Gehôri, got, gebet mîn, so ik biddon; fan forhtun fiundis genere sêla mîna.
Thu beschirmedos mi fan samnungun uueldâdigero, fan menege uuirkindere unreht;

[p. 32]

4.

UUanda scerpidon also suert tungon iro, thenedon bogo, saca bittera, that sia scietint an hulingon umbeuuollenin;

5.

Gâlico scutton sulun imo, in ne sulun forhtun. Gefestodon sig uuort nieuuiht,

6.

Taldon that sia behêlin strikke; quâthun: uue sal gesian sia?

7.

Undersuohton unreht, tefuoron suokinda irsuokenussi.

8.

Genâcon sal man in hertin diepin, in irhauan uuirthit got.

9.

Scefte lutticoro gedâna sint uundon iro, in ummahtiga sint angegin im tungen iro.

10.

Gidruouida sint alla thia gisâgon sia, in forhtida allaman; in cundidon uuerk godis, in dâde sîna an farnâmen.

11.

Blîthon sal rehlico an hêrron, in getrûon sal an imo, in gelouoda sulun uuerthun alla rehlica an hertin.