De oudnederlandse (oudnederfrankische) psalmenfragmenten

Psalm LXII

Got, got mîn, te thi fan liohte (te) uuaconi; thursta an thi sêla mîn, so manohfoltlico thi flêisc mîn an erthon uûstera in âna uuega in un-uuaterfollora.
Sô an hêiligin geschêin ic thi, that ic gisâgi craft thîn in guolikhêide thîn.
UUanda betera ist ginâtha thîna ouir lîf; lepora mîna louon sulun thi.
Sô sal ik quethan thi an lîue mînin, in an namon thînin heuon sal ik heinde mîni.
Also mit smere in mit fêite irfullit uuerthe sêla mîn, in mit leporon mendislis louan sal munt mîn.
So gehugdig uuas thîn ouir strô mîn, an morgan thencon sal ik an thi, uuanda thu uuâri hulpere mîn,
In an getheke fetherono thînro mendon sal.
Cliuoda sêla mîn aftir thi; mi antfieng forthora thîn.
Sia geuuisso an îdulnussi suohtun sêla mîna, ingân sulun an diepora erthon;
Gegeuona uuerthunt an handun suerdes, dêila uusso uuesan sulun. Cunig geuuisso blîthon sal an gode. Gelouoda (uuerthunt) alla thia suerunt an imo, uuanda bestuppot ist munt sprekendero unrihta.