De oudnederlandse (oudnederfrankische) psalmenfragmenten

Psalm LXI

Thanne sal gode undirthûdig uuêsan sêla mîna? Fan imo geuuisso sâlda mîn.
UUanda in hie got mîn in neriando mîn, antfengere mîn: ne uuerthe ik irruert further.
UUo lango anafallit an manni? reslât alla iu, also uuende gesigenero in tûni faruurpana?
Nouan-thoh uuerd mîn thâhton te faruuerpene, ic ran an thursti; munde iro quedidon, in an hertin iro faruuîtton.
Nouan-thoh undirthûdig sîs, sêla mîn; uuanda fan imo gethult mîn.
UUanda hie got mîn in neriando mîn, hulpere mîn: ne sal ic ûtfaron.
An gode sâlda mîn in guolichêide mîn; got hulpon mînro, in tohopa mîn an godi ist.
Getrûit an imo, al samnunga folkis, ûtgietit furi imo herta iuua: got hulpere unsa an êuuon.
Nouan-thoch îdela kint manno, lugina kint manno an uuâgon, that sia bedriegen selua fan îdilnussi an that selua.
Ne ruokit gi to trûoni an unreht, in rôuuas ne ruokit to gerone; rîkduoma of sia thîunt, ne ruokit herta te settane.
Êinis sprac got, tuêne thia gehôrda ik: uuanda geuualt godis (ist).

[p. 31]

13.

In thi, hêrro, genâtha; uuanda thu geuen salt êinuuilikin bi uuerkon sînin.