De oudnederlandse (oudnederfrankische) psalmenfragmenten

Psalm LIX

Got, faruurpe unsig in testôrdos unsig; thu irbulgi thi in genâthodos unsig.
Thu irruordos ertha in gedrûuedos sia; hêile tebrocannussi iro, uuanda irruort ist.
Thu ôugedos folki thînin harda thing; drencodos unsig....¹⁾ bereuuissi.

1) Hier heeft het hs. een kleine leemte met de aantekening: ‘deest una dictio’.

[p. 29]

6.

Thu gêui andrâdondin thi têikin, that sia flien fan antscêine bogin,

7.

That generoda uuerthin lieua thîna. Behaldan duo mit forthoron thînro in gehôri mi.

8.

Got sprak an hêiligin sînin: blîthon sal in dêilon sal ic Sicimam, in dal selithono sal ic metan;

9.

Mîn ist Galaad in mîn ist Manasses, in Effraim sterke hôuidis mînis;

10.

Iuda cunig mîn, Moab ûla tohopin mînis. An Idumeam sal ic thenan gescûe mîn; mi fremit-borona undirthûdiga sint.

11.

UUe sal lêiden mi an burg fastero? uue sal lêidon mi untes an Idumeam?

12.

Ne salt tu, got, thia faruuirpi unsig? in ne saltu gân, got, an creftin unsin?

13.

Gif unsig hulpa fan arbêide; in îdil sâlda mannis.

14.

An gode duon sulun uuir craft, in hie te nieuuihte lêiden sal uuîttononda unsig.