De oudnederlandse (oudnederfrankische) psalmenfragmenten

Psalm LVIII

Gineri mi fan fiundun mînun, got mîn, in fan anstandandon an mi genere mi.
Genere mi fan uuirkindon unreht, in fan mannon bluodo bihalt mi.
UUanda ecco fiengon sêla mîna, analiepon an mi starca.
Noh unreht mîn, noh sunda mîn, hêrro, sundir unreht ran ik in gerichtit uuarth ik.
Upstâ an geginlôup mînin in gesig! in thu, hêrro got crefto, got Israelis, thenco te uuîsene alla thiadi; ne genâtho thu allon thia uuircunt unreht.
Bekêrda sulun uuerthun te âuandi, in hunger tholon sulun also hunda, in umbigân sulun burg.
Ecco sprêcan sulun an munde iro in suert an leporon iro; uuanda uue gehôrda?

[p. 28]

9.

In thu, hêrro, behoscon salt sia, te nieuuihte lêidon saltu alla thiade.

10.

Sterke mîn te thi sal ik huodan.

11.

UUanda got antfengere mîn. Got mîn genâtha sîn furicumun sal mi.

12.

Got ôugit mi ouir fiunda mîna. Ne reslag thu sia, that nohuuanne ne fargetin folk mîn; tesprêide sia an crefte thînro in antsette sia, bescirmere mîn, hêrro.

13.

Misdât mundis iro, uuort leporo iro, in befangana uuerthin an ouirmuodi iro.

14.

In fan faruuâtannussi in fan lugenon cunda sulun uuerthun an thurofremingon, an âbulge thurofremingen, in ne sulun uuesan; in uuitton sulun uuanda got sal uualdan Iacobes in endi erthon.

15.

Bekêrda sulun uuerthun te âuandi, in hunger tholon sulun also hunda, in umbigân burg.

16.

Sia tresprêida uuerthint te etoni; of geuuisso ne uuerthint sada, in murmulon sulun.

17.

Ik eft singen sal sterke thîn, in menden sal an morgen ginâthi thînro; uuanda thu gedân bis antfengere mîn in flucht mîn an dage arbêithis mînis.

18.

Helpere mîn, thi sal ik louan, uuanda got antfengere bis-tu mîn; got mîn, genâthi mîn.