De oudnederlandse (oudnederfrankische) psalmenfragmenten

Psalm LVII

Of giuuâro geuuisso rehnussi spreket: rehlico irduomit, kint manno.
Geuuisso an hertin unreht uuirkit; an erthon unreht hendi iuuua macunt.
Gifirroda sint sundiga fan uuambun, irrodon fan reue; sprâcun lôsa thing.
Hêitmuodi im aftir gelîcnussi slangin, also aspidis dôuuero in stuppendero ôron iro.

[p. 27]

6.

Thie ne sal gihôrin stimma an-galendero in toufreres galendes uuîslico.

7.

Got tebrecan sal tende iro an munde iro; kinnebaco leono sal tebrecan got.

8.

Te nieuuete cumun sulun also uuatar rinnende; thenit bogo sînin, untes sia ummehtiga uuerthin.

9.

Also uuahs that flûtit ginumena uuerthunt; ouirfiel fûir in ne gesâgon sunna.

10.

Êr farnâmin thorna iuuua haginthorn, also libbende also an âbulge farsuuelgit sia.

11.

Blîthon sal rehlico so he gesiet uurâca, hendi sîna uuascon sal an bluodi sundigis.

12.

In quethan sal man: of geuuisso ist uuasmo rehlicon, geuuisso ist got irduomindi sia (an)erthon.