De oudnederlandse (oudnederfrankische) psalmenfragmenten

Psalm LVI

Ginâthi mi, got, ginâthi mi, uuanda an thi gitrûot sila mîn, in an scado fetheraco thînro sal ic gitrûon untes farlîthe unreht.

[p. 26]

3.

Ruopen sal ik te gode hôista, god thia uuala deda mi.

4.

Sanda fan himele in ginereda mi, gaf an bismere the trâdon mi.

5.

Santa got ginâtha sîna in uuârhêit sîna, in generida sêla mîna fan mitton uuelpo leono. Slîp ik gidruouit; kint manno tende iro geuuêpene in sceifte, in tunga iro suert scarp.

6.

Irheui thi ouir himila, got; in an alleri erthon guolikhêide thîne.

7.

Stric macodon fuoti mîna, in bougedon sêla mîna. Gruouon furi antscêine mîn gruoua in fielon an thia.

8.

Garo herta mîn, got, garo herta mîn, singin sal ic in lof quethan.

9.

Upstâ guolikhêide mîna, upstâ psaltere in cithara; up sal ik stân âdro.

10.

Bigian sal ik thi an folkon, hêrro, lof sal ik quethan thi an thiadi.

11.

UUanda gimikilot ist untes te himelon ginâtha thîn, inde untes te uulcon uuârhêit thîn.

12.

Upheue thi ouir himila, got, in ouir alla ertha guolichêide thîne.