De oudnederlandse (oudnederfrankische) psalmenfragmenten

[p. 25]

Psalm LV

Ginâthi mi got, uuanda trat mi man, allan dag anafehtonde uuîtonoda mi.
Trâdun mi fiunda mîne allan dag, uuanda manage fehtinda angegin mi.
Fan hôi dagis fortin sal ik; ic geuuisso an thi sal gitrûon.
An gode sal ik louan uuort mîn, an gode gitrûoda ic; ne sal ic fortan uuad duo mi flêisc.
Allin dag uuort mîna faruuieton; angegin mi alla gethâhti iro an uuele.
UUonun solun in bergin salun sig; sia fersna mîn beuuarun sulun.
Also tholodun sila mîna, fur nieuuehte behaldona sal-tu duon sia; an âbulge folc tebrecan saltu.
Got, lîf mîn cundida thi; thu sattos trani mîna an geginuuirdi thînro.
Also in an gehêite thînro. Than bekêron sulun fiunda mîne behaluo. In souuilikin dage ic ruopen, ecco bicanda uuanda got mîn bist.
An gode sal ic louan uuort, an hêrro sal ic louan uuort; an gode gitrûoda ik, ne sal ik fortan uuad duo mi man.
An mi sint, got, gehêita thîna, thia ik sal geuan louis thi.
UUanda thu generedos sêla mîna fan dôde in fuoti mîne fan glîdeni, that ic lîke fore gode an liohte libendero.