De oudnederlandse (oudnederfrankische) psalmenfragmenten

Psalm LIV

Gehôri got gebet mîn in ne faruuirp bida mîna; thenke te mi in gehôri mi.
Gidruouit bin an tilongon mînro, in mistrôst bin fan stimmon fiundes in fan arbêide sundiges.
UUanda genêigedon an mi unreht, in an âbulge unsuoti uuâron mi.
Herta mîn gidruouit ist an mi, in forta dôdis fiel ouir mi.
Forchta in biuonga quâmon ouer mi, in bethecoda mi thuisternussi.
In ic quad: uuie sal geuan mi fetheron also dûuon, in ic fliugon sal in raston sal?
Ecco firroda ic fliende, inde blêif an ênôdi.

[p. 24]

9.

Ic sal bêidan sîn thie behaldon mi deda fan luzzilhêide gêistis in fan geuuidere.

10.

Bescurgi, hêrro, tedêile tunga iro; uuanda ic gesag unreht in fluoc an burgi.

11.

An dag in an naht umbifangan sal sia ouir mûra iro unreht, in arbêit an mitdon iro in unreht.

12.

In ne tefuor fan strâton iro prisma in lôsunga.

13.

UUanda of fiunt flûkti mi, ic tholodi geuuisso, in of thie thie hatoda mi ouir mi mikila thing sprêke, ic burge mi so mohti geburran fan imo.

14.

Thu geuuisso man êinmuodigo, lêido mîn in cundo mîn.

15.

Thu samon mit mi suota nâmi muos; an hûse godes giengon uuir mit geluui.

16.

Cumi dôt ouir sia, in nitherstîgin an hellon libbenda; uuanda arhhêide an selethen iro, an mitdon im.

17.

Ik eft te gode riep, in hêrro behielt mi.

18.

An âuont in an morgan in an mitdon dage tellon sal ic in kundon, in he gehôron sal.

19.

Irlôsin sal an frithe sêla mîna fan thên thia ginâcont mi, uuanda under managon he uuas mit mi.

20.

Gehôrun sal got in ginetheron sal sia, thie ist êr uueroldi.

21.

Ne geuuisso ist im uuihsil, in ne forchtidon got; theneda hant sîna an uuitherlôni.

22.

Beuuollon urcuntscap sîna, tedêilda sint fan âbulgi antscêines sînis, in ginêkeda herta sîn. Geuuêicoda sint uuort sîn in ouir olig, in sia sint gescot.

23.

UUirp ouir hêrrin sorga thîna inde he thi tion sal: in ne sal geuon an êuuon uuankilhêide rehlikin.

24.

Thu geuuisso got lêidon salt sia an pute an-frêson. Man bluodo in lôsa ne solun gemitdelon daga iro; ik eft ic getrûon sal an thi, hêrro.