Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe

Gautier gheeft te kennen aen Griseldis dat die Bruyt die hy ghehaelt hadde zijn Dochter was, ende vertroost Griselden eyndelijck,

ALs Gautier dan met der Maget zijnder dochter over maeltijt sat met alle de Heeren ende Vrouwen, so riep hy voor hem Griseldes, seggende in schimpe Griseldis wat dunckt u van mijnder Bruyt is zy niet schoone, ende ghenoeghlijcken Griseldis andtwoorde, ende seyde: Seker Heere, ghy en hadt gheen schoonder noch gheene edelder moghen vinden.

Ic bidde Godt dat gy met peys ende gheluck moet leven te samen. Ende ick bidde u Heer, dat gy deser Vrouwen alsoo hardt niet en zijt, als ghy waert uwen anderen wijve, want dese is iongher, ende teerder, ende curioselijcker opghehouden dan die ander was ende sy en soudet alsoo niet verdragen konnen. Als Gautier verstont, ende merckte die groote ghestadicheydt, ende ootmoedicheydt van haer, ende altoos daer in persevererende, soo en wilde hy hem niet meer veynsen oft dencken, maer hy stont op openbaerlijck voor hen allen, ende seyde Mijn Griselde mijn wijf, ic heb u ghenoech gheproeft, ende ghetemteert, ende bevonden uwe ghetrouwicheyt, ende ghestadicheydt. Ick meyne datter nu gheenen man op der aerden en is levende die so veel besocht heeft van zijnen wijve als ick doe vande mijne. Ende dit gheseyt wesende, soo nam hyse in zijn armen, ende omhelsdese. Doen soo werdt hy beschaemt, ghelijck een mensche die daer ontspringht uyt eenen wonderlijcken droome. Ende Gautier seyde voordt: Griselde gy zijt mijn wijf alleene, ende anders en heb ick gheene ghehadt, noch nimmermeer hebben en sal. Dese Maghet die gy hier siet voor mijn Bruyt, is u dochter, ende de mijne. Ende desen ionghen man den welcken men hout voor mijnder susters Soon der gravinne van Buenen, is onser beyder kindt, welcke twee

[fol. C6r]

kinderen ghy hebt altoos gemeynt verloren te wesen, ende nu hebdyse te samen ghevonden, ende ick wil dat elck weten sal, dat ick noyt gedacht en hebbe mijne kinderen te dooden, maer ick hebbe dit gedaen om u te ondersoecken, ende te proeven. Als griseldis dat hoorde van blijdtschappen viel sy neder in onmacht, als van haer selven niet wetende, ende als sy tot haer selven quam soo en konde sy haer selven niet versaden van helsen ende kussen hare kinderen. Die Vrouwen, ende Ionck-vrouwen namen griselden ende leydense in een camer daer zy ontkleet wert van haer quade kleederen, ende zy werdt met groote eerweerdicheyt herkleet met eerbaren, ende dierbaren kleederen als sy placht te dragen ter tijdt dat zy met Gautier haren man woonende was in 't palleys, ende daer na int lant van salusen met grooter blijschap. Ende van blijschap werdt daer gheweent menighen traen, ende op dien dach was die feeste meerder dan sy was ter eerster bruyloft van Gautier ende Griselden, ende doen ten alder eersten dede gautier komen woonen in zijnen Palleyse, Ian de Nicole, Vader van zijnen wijve, ende hielt hem alle zijn leven lanck in grooter eeren, daer't te voren scheen dat hy op zijnen sweer niet en letten ofte en achte. ende dese voorseyde Marck grave leefden met Griselden menich iaer in vrede, ende in minnen die een met den anderen, ende besteden haer dochter seer hoochlijck, ende eerlijck, ende na haerder beyder doot quam dat lant van Salusen op den voorseyden Sone die 't langhe, ende wel daer naer regeerde, Aldus ter Conclusien mach ick wel segghen als ick gheseydt hebbe, dat patientie is een groote deught. Ende die hier patientie heeft, ende Godt die wraecke op geeft, die sal daer veel badt af ghetoont worden, ende sijnen wille verwerven, dan oft hy daer selver die wraecke af dede, ende en wordet hem niet gheloondt hier in deser werelt dat sal hem geloont werden inden eeuwigen leuen, dat noch meer te prijsen is. Tot welcken leven ons wil brenghen, den Vader, den Sone, ende den heylighen gheest, Amen.

FINIS