Helena wordt ghevonden in een arm huysken.
ALs den Dienaer vanden Coninck Hendric hadde ghehoort dat hem den koninck ghelooft hadde hondert Marck goudts indien dat hy Helena hem wijsen konde, soo is den dienaer ghegaen tot inde strate daer hy Helena hadde sien gaen doen hy zijn peert drinckte, ende hy vraechde al omme oft niemandt en wiste waer woonde een Vrouwe met een handt, ende hem werdt ghewesen het huys daerse woonde. Ende hy is terstont ghegaen in dat huys ende vraechde de Weerdinne nae de Vrouwe met eender handt die met haer in woonde. Ende de weerdinne seijde dat sy geen Vrouwe met eender handt en kende: Want Helena haer hadde ghebeden dat sy doch niemant segghen en soude waer dat sy ware. Den geselle hoorende datse die Vrouwe loochende, seyde: Ick sal u doen hangen ende sterven ist dat ghyse my niet en wijst, want ic weet wel datse hier is, dus so seght my waer datse is ic sal den Bisschop ende den Coninck over u clagen, dit hoorende de Weerdinne sorchde voor haer lijf te verliesen en heeft den gheselle in huys gheroepen, hem wijsende een oude kiste daer Helena haer in verborgen hadde. Ende als Helena hoorde dat haer de Weerdinne ghewesen hadde, soo spranck sy terstont uyt de kist, ende viel voor den gheselle op haer knien, hem biddende om Godts wille dat hy haer doch wilde laten gaen, want hem met haer doot niet beholpen en waere, ende sy wert seer weenende. Dit ziende den gheselle namse vriendelijcken op vander aerden, ende seyde Ghenadighe Vrouwe ic bidde u laet staen u weenen, ic sweer u by mijn Chrisdom dat u geen arch noch quaet en sal geschieden maer u sal meerder eere ende reuerentie gedaen worden van al de Princen ende Heeren dan het oyt ghedaen was. Daerom so en wilt niet meer weenen noch schreyen, maer gaet mede in des Bisschops Palleys, daer u Vader ende u Man ende u twee kinderen zijn, ende sy hebben na u groot verlanghen.
Auteursrechtvrij