Hoe den Coninck weder ghekeert is, en Helena wijs maeckte dat hy consent hadde om haer te trouwen.
ALs dit den Patriarch gehoort hadde, soo was hy seer tonvreden, overdenckende met wat middelen hy sijnen Swagher de onredelijcke begheerte soude uyt den hoofde stellen. Ende heeft zoo veel ghedaen naer veel woorden ende discourssen dat hy vanden Koninck een maent uyt-stel verkregen heeft, hopende dat daer en tusschen yet soude over comen, waer door dat des Konincx sinnen souden mogen veranderen. Dus is den Koninck droevich zijnde, weder gereyst naer Constantinopelen, denckende, dat hy wel een maent uytstel verdragen soude. Maer onder wegen zijnde, so hebben hem sijne passien verwonnen, ende heeft beghinnen te versieren waer mede hy tot zijn voornemen soude mogen geraecken. Dus heeft hy selue brieven gheschreven, en beseghelt, als oft hyse vanden Patriarch ontfanghen hadde. Te Constantinopelen by zijn dochter ghecomen, soo heeft sy hem vriendelijck willekom gheheeten, ende den Koninc die nam zijn dochter metter handt, ende seyde met valscher herten: Mijn lieve dochter, ghy zijt alle die mijn herte bemindt boven alle vrouwen der wereldt, ende ick sal u trouwen, wandt u Oom den Patriarch heeft het my ghekonsenteert, ende liet haer de valsche brieven sien. Doen seyde Helena: Ick en gheloove niet dat den Patriarch macht heeft te konsenteren dat tegen Godts Wet is, ende daerom sal ick u niet trouwen al soudy my d'een lit van d'ander doen trecken. Ende na desen ende veel ander woorden, dede den Coninck zijn dochter slapen gaen, ende hy gheboot datmen t'Hof behangen soude met tapisserijen, want hy des anderen daeghs trouwen wilde.
Auteursrechtvrij