De Vorsterman Bijbel

§ Dat .xx. Capittel.

1

⁺ENde ick heb gesien een Engel dalende vanden hemel, hebbende den slotel des afgronts, ende een grote keten in zijn hant.

+ A

2

Ende hi heeft gegrepen den draec, doude serpent, dat is die duuel ende Satanas, ende heeft hem gebonden M. iaer,

3

ende heeft hem geworpen inden afgront, ende heeft hem gesloten, ende heeft ghesegelt op hem, dat hi die heydens niet meer verleyden en soude, ter tijt toe dat voleynt worden duysent iaren. Ende daer na moet hi ontbonden worden een weynich tijts.

4

⁺Ende ic heb stoelen gesien, ende si hebben daer op geseten, ende toordeel is haer gegeuen, ende die sielen der ghenen die onthooft waren om tgetuychnis Iesu, ende om twoort gods, ende die dat beest niet aengebeden en hebben, noch zijn beelt, ende niet ontfangen en hebben zijn teeken in haer voorhoofden oft in haer handen, ende si hebben geleeft ende geregneert met Christo .M. iaren.

+ B

5

Mer dander doden en hebben niet weder geleeft, totter tijt toe dat voleynt waren .M. iaren. Dyt is die eerste verrisenisse.

6

Salich ende heylich is, die een deel heeft in die eerste verrisenis. In dese en heeft die tweede doot gheen macht, maer si sullen wesen priesteren gods, ende van Christo, ende si sullen met hem regneren duysent iaren.

7

⁺Ende als .M. iaren voleynt zijn, so sal Sathanas ontbonden worden van zijnen kercker, ende hy sal wt gaen, op dat hy mach verleyden dye heydens, die op die vier hoecken des aerde zijn Gog ende Magog, op dat hi haer vergaderen soude in eenen strijdt, welcker getal is als tsant

+ C

[p. R6r]

des zees.

8

Ende si zijn geclommen opte breetheyt des aerde, ende hebben om gegaen den heerleger der heyligen, ende de lieue stadt.

9

Ende tvier is gedaelt van god wten hemel, ende heeft haer verslonden, ende die duuel die haer verleyde, is geworpen inde poel des viers, ende solphers daer dat beest,

10

ende die valsche propheten ghepinicht sullen worden nacht ende dach, van eewicheyt tot eewicheyt.

11

⁺Ende ick heb gesien eenen groten blinckende stoel, ende een daer op sittende, van wiens aensicht vliet aerde ende hemel, ende van haer en is gheen plaets geuonden.

+ D

12

Ende ick heb dooden gesien groot ende cleyn, staende in tegenwoordicheyt des throons, ende boecken zijnder op gedaen, ende een ander boeck isser op gedaen, twelck is des leuens, ende die dooden zijn geordeelt wtet ghene datter gescreuen was in die boecken, na haer wercken.

13

Ende die zee heeft gegeuen die dooden, die in haer waren, ende de doot, ende die helle hebben gegeuen de dooden die in haer waren, ende daer is geordeelt van een yegelick, na haer wercken

14

Ende die helle ende die doot zijn geworpen in die poel des viers. Dit is de tweede doot.

15

Ende die niet geuonden en is int boec des leuens gescreuen, is geworpen in die poel des viers.