De Vorsterman Bijbel

§ Dat .v. Capittel.

1

⁺ENde ic heb gesien in die rechter handt van die daer sittende was opten stoel, een boec bescreuen wesende van binnen ende van buyten, toe gesteken wesende met seuen segelen. [kolom]

+ A

2

Ende ic heb gesien een stercken Engel, predikende met luyder stemmen. Wie is waerdich tboec op te doen, ende zijn segelen af te breken?

3

Ende daer en was nyemant, noch inder aerden, noch onder die aerde, om op te doen tboec, noch daer in te sien.

4

Ende ic screyde zeer, datter nyemant waerdich gheuonden en was, om open te doen, ende tboec te lesen, noch te sien.

5

Ende een vanden ouders seyde mi. En screyt niet. ⁺ Siet, een leeu van tgheslacht van Iuda, dye wortel Dauid heeft verwonnen, op dat hy tboec mach open doen, ende zijn seuen segelen mach af breken.

+ B

6

Ende ic heb gesien, ende siet int middel des stoels, ende der vier dieren, ende int middel der ouderen, staende een lam, als doot geslagen wesende, hebbende seuen hoornen, ende seuen ooghen, welcke zijn seuen gheesten Gods, in alle die aerde gesonden wesende.

7

Ende hi is gecomen, ende heeftet boec wter rechter handt van dye daer sittende was inden stoel, ghenomen.

8

Ende wanneer hi tboec op gedaen hadde, so hebben die vier dieren, ende .xxiiij. ouders voor tlam geuallen, een yegelic hebbende harpen ende gouden phialen, vol met soeten roec, twelcke zijn gebeden der heyligen,

9

⁺ende si singhen een nyeu sanck, segghende. O here, ghi zijt waerdich dat boeck te ontfangen, ende op te doen zijn segelen, want ghi zijt doot geslagen, ende door uwe bloet hebt ghi ons verlost wt alle geslachten, ende talen, ende volck, ende nacien,

+ C

10

ende onsen god ons coningen ende priesters gemaect ende wi sullen opter aerden regneren.

11

Ende ic heb gesien ende gehoort een stem van veel engelen ront om den stoel, ende der dieren ende der ouderen, ende dusent der dusenden warender int getal,

12

⁺met luyder stemme, seggende. Tlam datter doot geslaghen is, is waerdich cracht te ontfangen, ende godlicheyt ende wijsheyt ende vromicheyt, ende eer, ende lof, ende gebenedidinge.

+ D

13

Ende ic heb alle creaturen gehoort, welcke is inden hemel, ende opter aerden, ende onder dye aerde, ende inder zee, ende al die daer in zijn, seggende hem, die daer was inden stoel sittende, ende tlam si gebenedidinge, ende eer, ende lof, ende mogentheyt, vander eewicheyt totter eewicheyt.

14

Ende die vier dieren seyden Amen. Ende die .xxiiij. ouders hebben in haer aensichten geuallen, ende hebben aengebeden die daer is leuende vander eewicheyt totter eewicheyt.