De Vorsterman Bijbel

[p. Q4v]

[kolom]

Hier begint die tvvede Epistel van Sinte Ioannes Euangelist.

1

⁺DIe ouder, den wtuercoren vrouwe, ende haer kinderen die ic lief hebbe inder waerheyt, ende niet alleen ick, maer oeck alle die de waerheyt gekent hebben:

+ A

2

om die waerheit die in v blijft, ende met ons wesen sal inder eewicheyt.

3

Mer v si gracie, barmherticheyt: vrede, van God den vader, ende vanden Heere Ihesu Christo, den soon des vaders inder waerheyt ende liefte.

4

⁺Ic heb zeer verblijt geweest, dat ic geuonden heb van v kinderen inde waerheyt wandelende: geliken wi tgebot ontfangen hebben vanden vader.

+ B

5

Ende nv bid ick v vrouwe, niet als een

[p. Q5r]

nyeu gebot scriue ick v, mer dat wi vant beginsel gehadt hebben, op dat wi malcander lief hebben.

6

Ende dit is de liefte dat wi wandelen nae zijn geboden. ⁺ Dit is tgebot: geliken ghy van beginsel gehoort hebt, dat ghi daer in wandelt,

+ C

7

wanter veel verleyders inde werelt gecomen zijn, die niet en beliden dat Iesus Christus inden vleesch ghecomen is. Dese is die verleyder ende Antichrist.

8

Siet op v seluen: dat ghi niet en verliest dat ghy ghewrocht hebt: mer op dat ghi een volle loon ontfanct

9

Al dye ouertreet, ende niet en blijft in Christus leeringe, en heeft god niet. Die in Christus leeringe blijft, dese heeft den vader ende den soon.

10

⁺Coemter yemant tot v, ende dese leeringe niet en brenct, en ontfanct hem niet in huys, ende en groet hem niet

+ D

11

want die hem groet, die deelt mede zijn quade wercken.

12

Siet, ic hebbe v voorseyt, op dat ghi niet beschaemt en wort inden dach des heren, want ick v veel te scriuen hadde, so en heb ict niet willen doen doer brief ende inct. Maer ick hope dat ic tot v comen sal, ende mont tegen mont spreken, op dat v blijschap veruult si.

13

V wtuercoren susters sonen groeten v. Gracie si met v Amen.