De Vorsterman Bijbel

§ Dat .v. Capittel.

1

⁺ALle die geloeft dat Iesus is Christus is wt god geboren. Ende alle die lief heeft den ghenen die voort gebrocht heeft, heeft oec lief den ghenen die wt hem geboren is.

+ A

2

Daer in kennen wi, dat wi die kinderen gods lief hebben, als wi god lief hebben, ende zijn geboden onderhouden.

3

Want dit is die liefte gods, dat wi zijn geboden houden, ende zijn geboden en zijn niet swaer.

4

+ Want al dat wt god geboren is dat verwint de werelt, ende dit is de victorie

5

die de werelt verwint, dye ghelooft dat Iesus is die sone gods.

6

⁺Dit is die doer twater ende bloet gecomen is Iesus Christus, niet alleen doer twater, maer doer twater ende bloet. Ende de geest ist die daer getuycht dat Christus is die waerheyt.

+ B

7

Want drie zijnder die getuych gheuen inden hemel, die vader, twoort, ende die heylige geest, ende dese drie zijn een.

8

Ende drie zijnder die getuych geuen inder aerde, die geest, ende twater, ende bloet, ende dese drie zijn een.

9

Ist dat wi tgetuych der menschen ontfangen, tgetuych gods is meerder. Want dat is het getuych gods dwelc meerder is, doer welcke hi getuycht heeft van sinen soon.

10

Die inden soon gods geloeft [kolom] dye heeftet getuych gods in hem seluen. *

⁺ Die den soon niet en geloeft, die heeft hem logenachtich gemaect, want hy nyet gelooft en heeft int getuych dat god van zijnen soon getuycht heeft.

+ C

11

Ende dit is tghetuych dat god ons teewige leuen gegeuen heeft, ende dyt leuen is in zijn soon.

12

Die den soon gods heeft heeftet leuen. Die den soon gods niet en heeft: en heeftet leuen nyet.

13

Dit scrijf ic v, om dat ghi weten soudt dat ghi het eewige leuen hebt, die daer geloeft inden name des soons gods.

14

Ende dit ist betrouwen dat wi by god hebben, dat, ist dat wi yet begeeren nae zijnen wil, so hoort hi ons

15

Ende weten wi dat hi ons hoort in wat wy begeeren, so weten wi dat wi begeerten hebben die wi van hem gebeden hebben.

16

⁺Ist dat yemant zijn broeder siet sondigen een sonde niet totter doot, die sal bidden, ende sal hem tleuen geuen, den ghenen die sondigen niet totter doot. Daer is een sonde totter doot daer voor en seg ick niet dat ghi bidden sult.

+ D

17

Alle onreynicheyt is sonde, ende het is een sonde totter doot.

18

Wi weten dat alle die wt God geboren is en sondicht niet. Maer die wt god voort gebrocht is, die behout hem seluen, ende die quade en raect hem niet.

19

Wy weten dat wi wt god zijn, ende alle dye werelt is int quade gestelt.

20

Ende wy weten dat die soon gods gecomen is, ende heeft ons verstant gegeuen, om dat wy kennen souden den warachtighen God, ende dat wy zijn in zijnen warachtigen soon, dese is warachtich god, ende teewighe leuen.

21

Kinderkens, wacht v vanden afgoden.