De Vorsterman Bijbel

§ Dat .iij. Capittel.

1

⁺ALderliefste, siet nv scriue ick v desen anderen brief, in die welcke ick verwecke v reyn herte door vermaninghe,

+ A

2

op dat ghi gedachtich zijt die woorden die voorgheseyt zijn van die heylige propheten, ende ons gebots, die daer zijn apostelen des heeren ende des salichmakers.

3

Dat alder eerst wetende, datter comen sullen in die laetste dagen bespotters, dye na haer eygen begheerten wandelen

4

ende seggen. waer is dye beloftenisse oft zijn toecoemst? Want van dien tijt dat die vaders geslapen hebben, ⁺ also bliuen alle dingen van tbeginsel des sceppinge,

+ i.Ti. iiij.a. ij.Ti. iij.a.

5

⁺want dat en wetense willens nyet, dat de hemelen ende aerde voormaels gheweest hebben, ⁺ wt den water ende door twater staende, door dat woort gods,

+ B

+ Genesis. vij

6

door welcken dese werelt die toe was, is vergaen, ouergeuloeyt zijnde met water.

7

Mer dye hemelen ende aerde dye nv zijn, zijn versedt door zijns selfs woort, ende worden bewaert den vuer, inden dach des ordeels, ende verdoemenisse der godloser menschen.

8

Mer en laet v nyet dit een dinck ontgaen ghi beminden, ⁺ dat eenen dach by de heere is, gelijc als duysent iaren, ende duisent iaren als eenen dach.

+ Eze. xij.f.

9

Den Here en vertrect niet zijn beloftenisse, als die sommige meynen, mer hy is tegens ons lijdsamich, als hi nyet en wil dat yemant vergae, mer alle gader wil ont-[kolom]fanghen tot penitencie,

10

ende den dach des heeren sal comen als eenen dief, ⁺ inden welcken die hemelen sullen vergaen, geliken een storm, ende die elementen sullen gesmolten worden van hitte, ⁺ die aerde ende alle die wercken die in haer zijn, ⁺ sullen verbrant worden.

+ i.Tes. v.a Apo. iij.a

+ C

+ Apo. xxi.a

11

Daer om, als dese dingen nv al vergaen, hoedanich moet ghi wesen in heylighe conuersacien ende goddiensticheden,

12

verwachtende ende haestende tot den toecoemst vanden dach des Heeren, door welcke die hemelen ontsteken zijnde, sullen vergaen, ende die elementen smelten van dye hitte des viers?

13

Maer wi verwachten nyeuwe hemelen, ende nyeuwe aerde, ende zijn beloftenisse, in welcken de rechtueerdicheyt woont.

14

⁺Waer om ghi beminde dese dinghen verwachtende, weest naerstich dat ghy onbeulect ende suuer geuonden moecht worden van hem in vrede

+ D

15

ende acht die langmoedicheyt ons heeren Iesu christi voor salicheyt, als ooc onse lieue broeder Paulus, na die wijsheyt die hem gegeuen is, v gescreuen heeft,

16

ooc by na in alle zijn brieuen, sprekende van dese dingen, onder welcke zijn somige swaer om te verstaen, die welcke die ongeleerde ende ontstantuastighe verargheren, gelijc ooc ander scriftueren, tot haers selfs verdoemenisse.

17

Daer om ghi broeders, na de mael dat ghi te voren vermaent zijt. Wacht v dat ghi niet te samen met die anderen quader dwalinge verleyt zijnde, valt van v eygen stantuasticheyt:

18

Mer opwast in die gracie ende kennisse ons heren ende behouder Iesu christi. Hem si glorie ende nv ende totten dach des eewicheyts Amen.