De Vorsterman Bijbel

[p. Q2e]

[kolom]

Hier beghint die ander Epistel, dye de heylighe Apostel Sinte Peeter gescreuen heeft.

§ Dat eerste Capittel.

[afbeelding]

1

⁺SYmon Petrus knecht ende Apostel Iesu Cristi, den ghenen die een gelijck geloue met ons vercreghen hebben, door dye rechtuaerdicheyt ons gods, ende des salichmakers Iesu christi

+ A

2

Die gracie ende vrede moet v veruult worden door die kennisse Gods, ende Christi Iesu ons Heeren.

3

Also als zijn godlike cracht ons al gegeuen heuet, dat tot leuen ende goddiensticheyt behoort, ⁺ door die kennisse van dien, die ons geroepen heeft, door die eyghen glorie ende macht,

+ B

4

door welcken ons die costelike ende grootste beloftenissen gegeuen zijn, op dat ghi door dese worden soudt deelachtich des goddelijcke natuer, ist dat ghi af vliet vande bederfelicheyt des begeerlicheyts die in de werelt is

5

Ghi al v naersticheyt daer toe doende, dient in uwen geloue die duecht, in die duecht dye wetenscap,

6

in die wetenscap maticheyt, ende in maticheyt paciencie, in paciencie goddiensticheyt

[p. Q2v]

7

ende in goddiensticheyt die broederlike liefde, in broederlike liefde die charitate.

8

Want ist dat dese dingen by v zijn ende oueruloeyen, si en sullen v niet ledich ende sonder vrucht stellen, in die kennisse ons heren Iesu christi,

9

want die dese dingen niet bi en zijn, die is blint, ende sueckende den wech met die hant, verghetende dat hi van die oude sonde gereynicht was.

10

⁺Waer om broeders, doet meerder neersticheyt, dat ghi vast maect door goede wercken v roepinge ende verkiesinge, want ist dat ghy dit doet, so en suldy nymmermeer sondigen

+ C

11

Want aldus sal v oueruloedelic bedient worden, die inganck int eewich rijck ons heeren ende behouders Iesu christi.

12

Waer om, ic en salt niet vergeten te vermanen van dese, al ist dat ghijt weet ende gheuesticht wort in die teghenwoordige waerheyt.

13

Ic meyne dattet recht is v te verwecken door die vermaninge, also lange als ic ben in dit tabernakel.

14

Ic weet dat gheringe die aflegghinge mijns tabernakels geschien sal, na dat onse heer Iesus christus my te kennen gegeuen heeft.

15

Ic sal naersticheyt geuen, op dat ghi na mijn wtganck moecht maken gehoochnisse deser dingen.

16

⁺Wi niet geuolcht hebbende ongeleerde fabulen maken v condich die cracht ons heeren Iesu christi, ende dat voorsien, mer wi hebben met onsen oogen aengesien zijn heerlicheit,

+ D

17

want hi hadde van god den vader ontfangen eer ende glorie, doe dusdanigen stemme neder daelde tot hem van die grootmakende glorie. ⁺ Dese is mijn lieue soon, in die welcken mi behaecht is, horet hem.

+ Mat. iij.b Mar. i.b Luc. 3 c

18

Ende dese stemme hebben wi gehoort nederdalende vanden hemel, doe wi tsamen waren met hem inden heylighen berch.

19

Ende wi hebben een vaster prophetelick woort, den welcken als ghijt aenmerct als een licht openbarende is in een duyster plaetse, so doet ghi recht, ter tijt toe dat den dach begint te lichten, ende den lichtdrager opgaet in uwe herten.

20

Dat eerst wetende, dat prophetelijcke scrifture niet en is van een eygen beduydenis

21

want die prophecie en is voortijts niet toegebrocht met die wille des menschen, ⁺ maer dye heylige menschen gods, gedreuen zijnde vanden heyligen geest, hebben gesproken.

+ 2.Tim. 3.d