De Vorsterman Bijbel

§ Dat .v. Capittel.

1

⁺ICk bidde den priesteren dye onder v zijn die selue oock een priester ben, ende een ghetuyge des lidens Christi, ende mede selfs deelachtich der glorie die gheopenbaert sal worden in die toecomende tijt.

+ A

2

Doet also vele als in v is de kercke gods, sorge voor haer hebbende niet bedwongen, maer willich nae god, niet om scandelic ghewin, mer met een toegeneychde moet,

3

ende niet als heerscappie hebbende ouer v ondersaten, mer also, dat ghi zijt een exemplaer des kercs.

4

Ende als die prins der herderen sal comen, dan sult ghi ontfangen een onuerderfelike croon des glorie.

5

Des ghelijcs ghi ionghen, weest onderdanich den priesteren, ⁺ ende bewijst malcanderen ootmoedicheyt, ⁺ want god den houaerdigen teghen staet, mer de ootmoedige geeft hi gracie.

+ B

+ Iac. 4.b Mar. i.b Luc. 3 c

6

+ Daer om verootmoedicht v onder dye machtighe hant gods, op dat hy v verheffen wil in dye tijt des besoeckings,

7

alle v [kolom] sorge in hem worpende: want hi heeft sorge van v

8

⁺Weest sober, ende waect, want v tegenpartie die duuel gaet om briesschende als een leeuwe, soeckende die hi verslinden mach,

+ C

9

den welcken vast int geloof zijnde tegenstaet, wetende dat de selue tribulacien uwe broederschap die inde werelt is, gedaen wort.

10

⁺God van alre gracie dye ons door Iesum christum geroepen heeft tot zijnder eewige glorie, die sal v een luttelken ghepinicht zijnde, vermaken, stercken ende beuestighen.

+ D

11

Hem si glorie ende geweldicheyt inder eewicheyt. Amen.

12

Ic heb v door Siluanum uwen getrouwen broeder (als ick meyn) met weynich woorden gescreuen, vermanende ende betuygende, dat dit die warachtige gracie Gods is, daer ghi in staet.

13

Die kercke dye daer is in Babylonien vergadert groet v, ende Marcus mijnen soon

14

Groet malcanderen met een heylighe cusse Gracie si v allen, die daer zijt in Christo Iesu Amen.