De Vorsterman Bijbel

[p. P8v]

[afbeelding]

Hier beghint die eerste Epistel die de heylighe apostel sinte Peeter gescreuen heeft.

§ Dat eerste Capittel

[kolom]

1

⁺PEtrus Apostel Iesu Christi, den verstroyden vremdelinghen inwonende Pontum, Galaciam, Capodociam, Asiam, ende Bithiniam,

+ A

2

den wtuercoren na dye voorsienicheyt van God den vader, doer heylichmakinge des gheests, in gehoorsamheyt: ende besprenkenisse des bloets Ihesu Christi. Die gracie, ende vrede, moet v vermenichfuldicht worden.

3

⁺Ghelooft si God, ende den vader ons heeren Iesu Christi, ⁺ dye na zijn oueruloedighe barmherticheyt ons weder gewonnen heeft tot een leuende hope. Daer in dat Christus is op ghestaen wt den dooden,

+ B

+ ij.Cor. i.a. Ephe. i.a.

4

in een onsterflike, onbeulectelike, ende onuerderflicke, erue, bewaert wesende inde hemelen in v,

5

die bewaert wortste met dye cracht gods: doer tghelof, tot salicheyt die daer toe bereyt is op dat si openbaer mach worden inden lesten tijt.

6

In welcke ghy verbliden sult, nv tot een corte tijt ghequelt zijnde, in verscheyden beproeuinghen, is dattet van noode is,

7

waer doer dye ondersoeckinghe uwer ghelooue, veel costelijcker dan gout dat doer tvier beproeft wort, mach worden gheuonden tot lof, glorie, ende eer, dan als Ihesus Christus gheopenbaert sal worden *

8

den welcken als ghy nyet en siet, bemint. Inden welcken als ghy hem nyet ghesien en hebt, in teghenwoordicheyt, nochtans gheloouende, verblijt met onsprekelijcke ende gheglorificeerde blijschap,

9

wech draghende teynde ws gheloofs dye salicheyt uwer sielen.

10

⁺Van welcke salicheyt dye propheten hebben neerstelic gheuraecht ende ondersocht welcke hebben ghepropheteert van dye toecomende gracye in v.

+ C

11

Ondersoeckende tot wat, oft hoedanighe punt des tijts, dye gheest Christi dye in haer was, te kennen gaf, den welcken eer si geschieden, gaf ghetuychnis vander tribulacyen dye Christo ouercomen souden, ende oock glorien dye daer na volghen souden.

12

Welcken propheten dit oock gheopenbaert is dat niet haer seluen, maer ons dees dinghen dient, dye in v vercondicht zijn, doer dye ghene dye ons ghepredict hebben dat Euangelium, doer den heylighen gheest, wten hemel ghesonden, inden welcken dye Engelen begheeren te sien.

13

Waer om op gescort hebbende die lenden

[p. Q1r]

ws verstants, sober zijnde, hoept volstandeliken in die gracie die tot v ghebrocht wort in een openbaringe van Iesu Cristo,

14

als gehoorsaem kinderen, dat ghi v seluen niet en geeft der voorleden begeerlicheden, met de welcken ghi worde geleyt, doe ghi Christum niet en kende,

15

maer gelikerwijs die ghene die v geroepen heeft, heylich is, ⁺ also wordet ooc heylich in alle conuersacie:

+ Leui. xix.a Luc. xix.a. Deu. x.b Col. iij.a Iaco. ij.d Actu. x.f

16

wanter gescreuen staet. Weest heylich, want ic heylich ben.

17

Ende ist dat ghi sonder aensien van personen aen roept den vader, ordelende na dat werc van een yegelic, ⁺ siet toe dat ghi in dese vreese wandelende, doorbrengt den tijt uwer inwoninge,

+ D

18

+ wetende dat ghi niet verlost en zijt van uwer ydel conuersacie des vaders insettinges met verganckelike dingen, als gout ende siluer

19

maer met dat costelick bloet als des onbeulecten ende pueren lams Cristi, ⁺

+ Ephe. vi.d Heb. ix.d i.Ioan. i.c

20

dye daer voor kent was, eer die werelt gescapen was. Mer inde leste tijden is hi openbaer gheworden om uwen wille,

21

die welcke door hem ghelooft in god, die hem verwect heeft wt den dooden, ende hem glorie gegeuen heeft, op dat ghy hebben soudt geloof ende hoep tot god.

22

Reynigende uwe sielen in onderdanicheyt der liefden, met broederlike liefde, wt simpelder herten bemint malcanderen seer,

23

⁺weder om geboren zijnde, ⁺ niet wt sterflike saet, mer wt onsterflike, door dat woort des leuenden gods, ende inder eewicheyt bliuende.

+ E

+ Apo. i.b

24

Daer omme, wandt alle vleesch hoy is, ende alle glorie des menschen, als die bloeme des hoys. Thoy is dorre gheworden, ende die bloeme is af geuallen, ⁺

+ Iac. i.b Ec. xiiij.c. Esa. xl.b

25

maer twoort gods blijft inder eewicheyt. Dat is dat woordt dat nv vercondicht wort.