De Vorsterman Bijbel

§ Dat .v. Capittel.

1

⁺WEl aen nv ghy rijcke screyt, huylende op v catiuicheden, dye v toecomen sullen.

+ A

2

V rijckdommen zijn verrot, v clederen zijn vande motten ghegeten,

3

v gout ende siluer is roestich gheworden, ende haer roest sal v wesen tot een ghetuychnis: ende sal eten v vleesch wt alst vyer. Ghi hebt v toornicheyt vergadert in die leste dagen.

4

Siet, tloon der werclieden die v landen ghemaeyt hebben, twelck doer bedroch van v niet ghegeuen en is, dat roept, ende troepen der gheenre dye gemaeyt hebben is ingegaen inden ooren des heren sa both.

5

Ghi hebt gheleeft opter aerden in wellusticheyt, ende hebt broot droncken geweest, ende hebt v herten gheuoet: als inden dach des dootslaginge.

6

Ghi hebt verordeelt ende doot geslegen den rechtuerdigen, ende hy en heeft v niet tegen ghestaen.

7

⁺Broeders, weest daer om verduldich tot die toecoemst des heeren. Siet den ackerman verbeyt die costelijke vrucht des aerde lijdsameliken verbeydende hem ter tijt toe dat hy ontfanct tijtliken, ende laten regen.

+ B

8

Daer om weest ghy oock verduldich ende vesticht v herten, want die toecoemst des heren ghenaect.

9

En wilt niet suchten teghen malcanderen, op dat ghi niet verordeelt en wort. Siet die rechter staet voor die duere.

10

Mijn broeders, neemt die propheten tot een exempel des lidens, ende lijdtsamicheyts, die gesproken hebben inden naem des heeren. *

11

Siet, wy achtense salich die verdraghen hebben. Ghi hebt gehoort dye verdraechlicheyt van Iob, ende hebt ghesien teynde des heren, dat die Heere seer barmhertich is, ende ontfermende.

12

⁺Mijn broeders voor al en wilt niet sweeren, ⁺ noch biden hemel, noch bider aerden, noch gheenderhande ander eet. Maer laet v woort ia, ia, neen, neen weesen, op dat ghi nyet en valt int ordeel.

+ C

+ Mat. v.a.

13

Wort yemant liden aen gedaen onder v: bidde goets moets ende singe.

14

Isser yemant onder v sieck: die laet tot hem halen die priesteren des kercks, ende ouer hem bidden: saluende hem met olye inden naem des heren,

15

ende tgebet des gheloofs sal den siecken behouden, ende die Heere sal hem verlichten, ende is hy in sonden, si sullen hem vergeuen worden.

[p. P8v]

16

Belijdt malcanderen: ⁺ op dat ghy salich wort want een stadich ghebet der rechtuerdigen mach veel.

+ Mat. v.a 3.Regum. 4.

17

Helyas was een mensch als wi lidelic, ende heeft mettet ghebet ghebeden dattet niet reegenen en soude, ende ten heeft niet ghereghent opter aerden, in drie iaer, ende ses maenden.

18

Ende anderwerf so heeft hi ghebeden, ende den hemel heeft reghen ghegheuen, ende die aerde heeft vrucht voortghebrocht.

19

⁺Mijn broeders, ist datter yemant onder v dwaelt van dye waerheyt, ende yemant hem bekeert,

+ D

20

die sal weten dat die den sondare doet bekeeren van die dwalinge zijns weechs, sal salich maken zijn siele vander doot, ende bedect die veelheyt der sonden. *

§ Hier is voleyndt die Epistel, dye de apostel sint Iacob ghescreuen heeft, die welcke men heet die mindere.