De Vorsterman Bijbel

§ Dat .xxvi. Capittel.

1

⁺AGrippa seyde tot Paulum. Het wort v gheorloeft voor v seluen te spreken. Doe sprack Paulus met wtgherecter hant, voor hem seluen.

+ A

2

Coninc Agrippa, ick achte mi salich te zijn, om dat ic mi heden verantwoorden sal voor v, van allen dien dingen, van welcken ick vanden Ioden beschuldicht worde:

3

in dien ghi alder meest wetende zijt beyde die gewoonten ende vragen die biden Ioden zijn. Daer om bid ic v dat ghi mi verduldelick horen wilt.

4

⁺Hier om. Mijn leuen dat ick van mijnre iuecht geleyt hebbe, welcke van beghinsel gheweest is onder mijn volck tot Hierusalem, bekennen alle die Ioden,

+ B

5

die mi eerst kenden van beghin, wouden si daer getuych af gheuen, als dat ick na die alre wtghelesenste secte onser religien een phariseus geleeft hebbe.

6

Ende nv doer den hoep der beloftenissen, die tot onsen vaderen van god is gheschiet, so stae ick onder dat oordeel,

7

tot welcken hoep onse twaelf geslachten ghestadeliken nacht ende dach god dienende, hopen te comen, van welcken hoep Coninck Agrippa ick beclaget worde vanden Ioden.

8

Wort dat by v ongelooflijck gheordeelt, dat god die dooden verwect?

9

⁺Ende ick meende tegen den naem Iesu van Nazareth, veel dingen weder vechtende te doen,

+ C

10

dat ick oeck gedaen hebbe te Hierusalem, ende veel der heyligen heb ick in kerckeren ghesloten, vanden princen der priesteren macht ontfangen hebbende. Ende als si ghedoot worden, so gaf ick dat vonnisse.

11

Ende doer alle synagogen, haer menich weruen pinigende: bedwanck ick haer te blasphemeren, ende noch meer teghens haer rasende, veruolchde ick haer oeck tot vreemden steden toe,

12

om welcken dingen wille, als ick tot Damascum reysde met macht ende orlof der princen der priesteren,

13

so heb ick o Coninck gesien op den middach inden weghe, dat my vanden hemel een licht bouen dat schijnsel der sonnen omscheen, ende die ghene die met my reysden.

14

⁺Maer als wi te samen neder geuallen waren ter aerden, soe heb ick gehoort een stemme sprekende tot mi, ende segghende in Hebreeuscher talen. Saule, Saule, wat veruolcht ghi my? Tis v hert tegen die prickel te sporren.

+ D

15

Ende ick hebbe geseyt. Heer: wie zijt ghy? Hi seyde. Ick ben Iesus van Naza-[kolom]renen: welcken ghi veruolcht.

16

Maer rijst op: ende staet op v voeten, want daer toe heb ick v geopenbaert, dat ick v tot eenen dienaer, ende getuyge stellen soude, der dingen die ghi ghesien hebt, ende der gheenre, in welcken ick v verschijnen sal,

17

verlossende v vanden volck ende heydenen, daer ick v nv toe seynde,

18

⁺dat ghi haer ooghen openen muecht, dat si bekeert worden van dye duysternisse tot dat licht, ende van die macht des duuels tot god, dat si vergiffenis der sonden ontfangen mogen, ende een deel onder den ghenen die geheylicht zijn doer tgeloof dat in my is.

+ E

19

Daer om Coninc Agrippa, en heb ick niet ongehoorsaem geweest die hemelsche openbaringe,

20

maer ick vercondichde ten eersten den ghenen dye zijn tot Damasco, ende te Hierusalem, ende doer alle dat lant van Iudeen ende daer nae oeck den Heydenen, dat si penitencie doen souden, ende hem tot God bekeeren, doende wercken weerdich der penitencien.

21

⁺Om deser saken wille hebben my die Ioden inden tempel aengetast hebbende gesocht te doden,

+ F

22

maer Gods hulpe vercregen hebbende, so stae ick tot heden ten daghe toe, betuyghende beyde cleyn ende groot nyet anders seggende, dan dat die Propheten ende Moyses te voeren gheseyt hadden te gheschien,

23

dat Christus liden soude, dat hy dye alre eerste wt dye verrisenissen der doden een licht vercondigen soude den volck ende den heydenen.

24

Maer als Paulus dese dingen voor hem seluen seyde, soe sprack Festus met luyder stemmen. Paule, ghy raest, veel schriften brengen v tot raserien.

25

Ende Paulus seyde Ick en rase nyet alre beste Feste, maer ick spreke woorden der warachticheyt ende soberheyt.

26

Want de Coninck weet van desen, by wien ick oec vrijeliken spreke, want ick vermoede, dat hem nyet van desen verborgen is, want dyt en is in gheenen hoeck geschiet

27

Gheloofdy Coninck Agrippa den Propheten? Ick weet dat ghijse ghelooft.

28

⁺Maer Agrippa seyde tot Paulum. Ghy raet mi een weynich christen te werden.

+ G

29

Ende Paulus seyde. Ick wensche van Gode, nyet alleen int cleyn deel, maer oeck int grote, nyet alleen v, maer oeck alle dye mi heden hooren alsodanich te wesen, als ick ben, wt ghenomen dese banden.

30

Ende dyt gesproken hebbende, is dye Coninck op gestaen, ende dyen rechter, ende Bernice, ende die by haer saten.

31

Ende als si besiden af gegaen waren, spraken si onder malcanderen segghende. Dese

[p. P5v]

mensche en heeft nyet gedaen, dat den doot oft den banden waerdich is.

32

Ende Agrippa seyde Festo. Men hadde desen mensche los moghen laten gaen, hadde hy den Keyser nyet gheappellert.