De Vorsterman Bijbel

§ Dat .xxvij. Capittel.

1

⁺MAer alst besloten was dat wi in Italien souden varen, so hebben si Paulum ende sommige andere geuangen, ouer gheleuert den Centurio der bende van Augusto ghenaemt Iulius.

+ A

2

Ende te schepe ghegaen zijnde in een schip van Adramiten, soe hebben wy af ghesteken, om te varen ontrent dye plaetsen van Asien. Ende Aristarchus wt Macedonien, van Tessalonien bleef by ons.

3

Ende des daechs daer na, quamen wy tot Sydon aen. Ende Iulius hadde hem beleefdeliken tot Paulum, ende heeft hem toegelaten dat hy tot zijn vrienden gaende, van haer waer genomen soude worden.

4

Ende als wy van daer af gesteken hadden: so hebben wy omtrent Cypers gheuaren, om dat dye winden contrarie waren.

5

Ende dye zee tegen Cilicien, ende Pamphilien leyt, ouer gheuaren hebbende, zijn wy ghecomen tot Lystram in Lycien.

6

⁺Ende daer vant Centurio een schip van Alexandrien, varende in Italien, ende setten ons daer in.

+ B

7

Ende als wy veel dagen langsamelick voeren, ende nauwelick tegen Gnidon gecomen waren, want die wint belettede ons, so zijn wy tot Creten aengheuaren omtrent Salmonem,

8

ende die nauwelic voorbi varende, zijn wi gecomen in een plaetse, die ghenoemt is Goede hauen, daer de stadt Thalassa nae by was.

9

Maer als nv veel tijts verlopen was, ende sorchlick was te varen, daer om oeck dat si nv ouer den tijt honger geleden hadden, so vermaende haer Paulus

10

seggende hen. Ghy mannen, ick sie dat dese vaert met hinder ende grote schade, niet alleen der vrachten ende des scheeps: maer oeck ons leuens geschien sal.

11

Maer Centurio geloefde meer den stier man, ende den pyloot, dan tghene dat van Paulo geseyt worde.

12

Ende als dye hauen onbequaem was om ouer te winteren, soe hebbender veel raedt ghenomen van daer te varen, ende oft si eenichsins mochten tot Phenicen comen, ⁺ om daer te winteren. Dese is een hauen van Creta, tegen den zuytwesten ende noortwesten wint.

+ C

13

Mer als den zuyden windt wayende was, meenden dat si haer voornemen vercreghen hadden ende staken af van Asson, ende scheepten voorby Creten. [kolom]

14

Maer niet lanck daer na verhief hem tegen Creten eenen wint, diemen noortoost noemt.

15

Ende als dat schip vanden wint gegrepen was: ende niet en mocht wederstaen, so gauen wi tschip den wint ouer: ende voeren also.

16

Ende in een eylant geuoert zijnde dat Clauda genoemt is, so en hebben wy naulic eenen boot connen gecrigen,

17

welcke wech genomen zijnde, besichden si hulpelicheden, onderscortende dat scip, vreesende dat si op die plaete vallen souden, ende dat vat hebbende laten vallen, voeren also.

18

Ende als wy met groten storm hier ende daer geworpen worden, deden si daechs daer na eenen wtworp,

19

ende des derden daechs worpen wy met onsen handen die ghereeschap des schips wt.

20

Mer als in veel dagen noch sonne noch sterren en verschenen, ende gheen cleyn onweder aenstaende was, so was alle hope ons leuens wech genomen.

21

⁺Ende alsmen lange geuast hadde, doe heeft Paulus int midden van hem staende geseyt O ghi mannen, het hadde van node geweest my gehoort te hebben, ende niet van Creta af geuaren te hebben, ende niet dat verdriet ende de schade geschiet te hebben.

+ D

22

Ende nv vermane ick dat, dat ghi goets moets wilt zijn, want nyemants leuen hier schade liden sal, dan alleen dat schip.

23

Want in desen nacht heeft by my gestaen een engel gods, wiens ick ben, ende welcken ick diene,

24

seggende. En vreest niet Paule. Ghi moet voor den Keiser gestelt worden, ende siet god heeftse v alle gegeuen die met v waren.

25

Daer om ghi mannen hebt goeden moet, want ick geloue god dattet alsoe zijn sal, als mi is geseyt.

26

Ende in een eylant moeten wi wt geworpen worden.

27

⁺Maer na dat dye viertiende nacht ouergecomen is geweest, als wi ontrent midder nacht in Adria varende waren, soe vermoeden die schippers dat hem eenich lant verthoont hadde,

+ E

28

welcke oeck dat dieploot wtworpen, ende vonden twintich passen diep, ende een weynich van daer geuaren, ende weder om dieploot ghesoncken hebbende, vonden si vijfthien passen.

29

Ende vreesende dat si aen scherpe plaetsen stoten souden, hebben si die vier anckers ten schepe wt geworpen, ende si begeerden dattet dach soude worden.

30

Mer als die schippers sochten wt dat schip te vluchten, ende si den boot neder ghelaten hadden inder zee, onder tschijne, oft si dye anckers vanden schepe wttrecken hadden willen,

31

soe heeft Paulus geseyt den Centurio, ende den ruyteren. Ten si dat dese int schip blijuen, ghy en sult nyet behouden mogen wesen.

32

Doen

[p. P6r]

hebben die ruyteren, die touwen vanden boot afghesneden, ende hebben dien laten drijuen.

33

Ende alst dach beghonste te worden, vermaendese Paulus al te samen, dat si spijse souden nemen, seggende. ⁺ Desen dach is den vierthiensten, dat ghi verwachtende, nuchteren blijft niet etende,

+ F

34

waerom dat ic v vermaene, dat ghi spijs wilt ontfangen, Want dat hoort tot uwer salicheyt, want nyemants van v een haeyr van sinen hooft verghaen sal.

35

Ende doen hi dat gheseyt hadde, nemende dat broot, heeft hi God ghedanct in die tegenwoordicheit van hen allen. Ende als hijt ghebroken hadde, bestont hi teten.

36

Als si dan al tsamen verblijt waren, so hebben si oock spise ontfanghen.

37

Ende wy waren al tsamen int schip, twee hondert ende ses ende tseuentich menschen.

38

Ende versadicht zijnde van spise, so ontlasten si dat schip, worpende die tarwe in die zee.

39

Ende alst dach was, en kenden si dat lant niet, maer si werden een creecke siende, hebbende eenen oeuer, daer si dochten dat schip in te worpen.

40

⁺Ende als si die Anckers inghenomen hadden, beualen si hen seluen die zee, ontbindende oock die banden des roers, ende heffende den spriet op tegen den den wint, soe voeren si naden oeuer.

+ G

41

Ende als si in een plaetse die van beyde siden de zee gheraect hadde, waren, stierden si tschip aen tsant, Ende dat voorste deel bleef vast staen onbeweghelick, maer dat achterste deel brack van die cracht der zee.

42

Ende den raet der ruyteren was, dat si die gheuangen dooden souden, dat niemant van haer, als si wt gheswommen waren, ontloopen soude.

43

Maer Centurio willende Paulum behouden, heeft haer vanden raet behindert, ende geboden, dat die ghene die swemmen mochten, haer seluen voor wtworpen souden, ende te lande raken,

44

ende die andere sommighe op die borderen, sommighe op die stucken vanden schepe. Ende alsoo ist geschiet, dat si alle behouden te lande quamen.