De Vorsterman Bijbel

§ Dat .iiij. Capittel.

1

⁺LAet ons dan vreesen, by auontueren dat wi niet achterlatende die beloftenisse, te gaen in zijn ruste, yemant van ons schijnt verlaten te wesen.

+ A

2

Want sekerlic het is ons vercondicht, ghelikerwijs als haer, maer ten heeft haer niet gebaet twoort, dat si gehoort hebben, niet ghemenct zijnde metten gheloue, vanden ghenen welcke si ghehoort hebben.

3

Wi die gelooft hebben, sullen ingaen in zijn ruste, als hi geseyt heeft. Sij en sullen niet ingaen in mijn ruste, als ick ghesworen heb in minen toorn, hoe wel dat die wercken volmaect zijn vant leggen des fundaments des werelts.

4

Want hi heeft gesproken in een plaetse vanden seuenden dach, aldus. ⁺ Ende God heeft gerust opten seuenden dach, van alle sinen wercken.

+ Gen. 2.a Psal. xciiij ende .iij.b

5

Ende weder om in dese plaetse. Si en sullen niet ingaen in mijn rust.

6

Ende wantet dan toecomende noch is, dat sommige ingaen sullen in die ruste, ⁺ ende den ghenen diet eerst vercondicht is, en zijn nyet ingegaen, om des ongeloofs wille,

+ B

7

weder om so beteekent hy eenen dach heden door Dauid, segghende, na so langen tijt, gelikerwijs alser geseit is. ⁺ Ist dat ghi heden hebt gehoort zijn stemme, en wilt nyet verherden v herten.

+ Psal. xciiij

8

Want waert sake, dat Ihesus haer rust ghegheuen hadde, hy en soude hier na in gheenre manieren van eenen anderen dach ghesproken hebben.

9

Daer omme soo wort den volcke gods een rustdach achter gelaten.

10

Want die inghegaen is in zijn ruste, dye rust ooc van sinen wercken, gelikerwijs als god vanden sinen.

11

+ Daer om soo laet ons haesten, om in te gaen in die ruste, op dat nyemant en valle [kolom] in dat selfde exempel des ongeloofs.

12

⁺Want gods woort is leuendich ende crachtich, ende doorsnijdender dan eenich swaert aen beyden siden snidende, ende is doordringende, tot dat scheyden des siels, ende ooc tsamen des gheests, ende der tsamen voeghinghen der leden ende merghen, ende is een rechter der ghedachten, ende voornemingen des herts.

+ C

13

Ende daer en is gheen creatuer, welcke niet openbaer en is in zijn aenschijn. Alle dinc is naect ende ontdect sinen ooghen, totten welcken ons woort is.

14

⁺Daer om, hebbende eenen grooten bisscop Iesum Gods soon, die doer die hemelen gesteghen is, ⁺ laet ons houden zijn belidinghe

+ D

+ Psalm. 33

15

Want wi en hebben ghenen bisscop, die welcke niet mede lijdt met onse crancheden. Mer door al beproeft, na dye ghelijckenisse sonder sonde.

16

Daer om so laet ons toe gaen met grooten betrouwen, totten stoel zijns gracien, op dat wij moghen verueruen barmherticheyt, ende gracie vinden tot een bequame hulpe. *