De Vorsterman Bijbel

[p. N1r]

[afbeelding]

Hier begint die Epistel die Sinte Pauwels ghesonden heeft tot Philemonem sinen lieuen vrient.

1

⁺PAulus geuangen Christi Ihesu, ende Tymotheus broeder. Philemoni, den lieuen onsen hulper,

+ A

2

ende Apiam de lieue suster, ende Archippo onsen mede strijder ende de ghemeynte, de welcke in v huys is.

3

Gracie si v ende vrede van God onsen vader, ende den Heere Ihesu Christo.

4

Ick danck minen God altijt uwer ghehoochnissen doende in mijn ghebeden,

5

hoorende v liefde, ende gheloof welc ghi hebt tot den Heere Ihesum, ende tot allen heylighen,

6

op dat die gemeenscap ws gheloofs crachtich wert in die kennisse van alle goet werc in Christo Iesu.

7

Want wy hebben veel blijschappen ende vertroostinghe in uwe liefde, om dat dye liedekens der heylighen door v gherust hebben, broeder.

8

⁺Waer omme, al heb ick groot betrouwen in Christo v te gebieden datter toe behoort

+ B

9

nochtans om die liefde, soo bidde ick lieuer aenghesien dat ghy zijt alsoo als Paulus die oude. Ende nv een gheuanghen Ihesu Christi

10

bidde voor minen soon, welcken ick ghegenereert hebbe in mijn banden Onesimo,

11

voortijts v onprofitich, maer nv v ende my seer profytich,

12

welcken ick weder ghesonden hebbe. Ende ontfanct hem voor mijn ledekens

13

welcken ick begheerde bi my te houden, op dat hy voor my dienen soude [kolom] inde banden des Euangelijs.

14

Maer sonder uwen raedt en heb ick nyet willen doen, op dat v goet niet wesen soude als van bedwanc maer goetwillich.

15

⁺Want daer om heeft hy by auontueren ontweken tot een tijt toe, op dat ghy hem eewich weder om ontfanghen soudet,

+ C

16

nv nyet als een knecht, maer voor een knecht, een lieue broeder, bisonder my, hoe veel te meer v, inden vleesch ende inden here?

17

Daer omme, ist dat ghy my hout voor een mede gheselle, ontfanct hem gheliken my.

18

Ende ist dat hi v yet gehindert heeft oft sculdich is, dat wijt my.

19

Ick Paulus hebt met mijn handt ghescreuen. Ick salt betalen (op dat ick v niet en seg) dat ghy oock v seluen my daer en bouen schuldich zijt,

20

also broeder sal ick v ghebruycken inden heere. Vermaect mijn ledekens inden here.

21

⁺Betrouwende van v ghehoorsaemheyt heb ick v ghescreuen wetende: dat ghi doen sult oock meer dan ick segghe.

+ D

22

Ende bereyt mi oock een herberghe, want ick hope dat ick door v ghebeden v ghegeuen sal worden

23

Epaphras mijn mede gheuanghen in Christo Iesu groet v.

24

Marcus: Aristarchus Demas, Lucas, mine helpers groeten v.

25

Dye gracie ons heren Iesu Christi met uwen gheest Amen. *

§ Ghescreuen ende ghesonden wt Romen met den knecht Onesimo.

Hier nae volcht die Epistel die Sinte Pauwels ghesonden heeft tot den Hebreeuschen ofte Ioden.