De Vorsterman Bijbel

[p. M5r]

[afbeelding]

§ Hier begint die eerste Epistel, die sinte Pauwels ghesonden heeft tot Tymotheum.

§ Dat eerste Capittel.

1

⁺PAulus apostel Iesu Christi: ⁺ nae tbeuel Gods ons salichmakers ende Iesu Christi ons hoops.

+ A

+ 2.Cor. i. Gala. i. Ephe. i i.petri. i.

2

Tymotheo den beminden sone int gheloof. Gracy ende barmherticheyt, ende vrede van god den vader ende Iesu Christo onsen heere.

3

Gelijckerwijs ick v ghebeden hebbe, dat ghy tot Ephesien blijuen soudt, doe ick in Macedonien reysde. Op dat ghy den somigen vercondigen soudet, dat si gheen ander leeringe en volgen,

4

ende niet en achten op fabulen ende geslacht redenen, dye sonder eynde zijn, welck meer vragen aen brengen dan stichticheyt gods, welck int geloof is.

5

⁺+ Want teynde des ghebots is dye liefde wt een reyn hert, ende goede conscientie, ende onbeueynst gheloof.

+ B

6

Van welcke sommige dwalende, zijn ghekeert tot ydele clappagie,

7

willende leeraers zijn des wets, nyet verstaende dat si spreken, noch vant ghene dat si bewijsen.

8

Wy weten dat dye wet goet is, ⁺ ist dat haer yemant wettelick ghebruyct.

+ Roma. v.c Gala. 4.a Exodi. x.a ende .xxi.a Leui. xviij. i.Corin. v.

9

Dat wetende, dat den rechuerdigen gheen wet geset en is: mer den onrechtuerdigen ende ongehoorsamen, den ongoduruchtigen ende sondaren, onheylighen ende onreynen: vaderslagers ende moederslagers,

10

dootslaghers, oncuyschers, bugghers, den menschen dieuen, loghenaren, meynedighe, ende watter ander [kolom] is, dwelck der leeringhe teghen is

11

nae den Euangelie des glorie des salighen Gods, twelck my betrout is.

12

Ende ick danck die mi geconforteert heeft in Christo Iesu onsen here ⁺ * want hi mi voor trou gehouden heeft, settende inden dienst

+ C

13

die eerst een blasphemeerder was, ⁺ ende veruolger ende belaster. Maer ick heb Gods barmherticheyt vercregen, want ict onwetende ghedaen heb door ongeloof.

+ i.Cor. v.c

14

Ende dye gracie ons heren heeft zeer oueruloeyet mettet gheloof ende liefte, die welcke is in Christo Iesu.

15

+ Tis een ghetrou woort, ende waerdich met alle manieren te ontfanghen, dat Christus Iesus in dese werelt gecomen is, om dat hi de sondaren salich soude maken, ⁺ welcker ic die eerste ben. ⁺

+ D

+ i.Cor. vij c

16

Maer daer om heb ick barmherticheyt vercreghen, op dat Iesus Christus in mi eerst thoonen soude alle verdrachlicheyt tot onderwijsinghe der ghenen dye in hem geloouen souden tottet eewige leuen.

17

Den coninck des eewicheyts, den onsterflijken, ontsienliken alleen God si eer, glorie van eewicheyt tot eewicheyt. Amen.

18

Dit gebot beueel ic v soon Timothee, na die prophecien die van v voortgegaen zijn, dat ghi daer in strijt eenen goeden strijt,

19

tgheloof hebbende, ende een goede consciencie, welcke somige van haer geworpen hebbende, int gheloof gedwaelt hebben:

20

van welck getal is Hymeneus ende Alexander, welcken ick den Sathan ouer geleuert heb, op dat si leeren nyet te blasphemeren.