De Vorsterman Bijbel

§ Dat .ij. Capittel.

1

⁺WAnt ghi weet selfs broeders onsen inganck tot v, datse niet ydel geweest en is,

+ A

2

maer dat wi eerst gheleden hebbende ende spuicheyt aengedaen zijnde (ghelikerwijs ghi weet) tot Philippen, so hebben wi stoutelick ghedaen in onsen god, om te spreken tot v dat Euangelie Gods in veel sorchfuldicheden.

3

Want onse vermaninge en is niet geweest wt bedroch, noch wt onreynicheyt, noch met list, maer gelijckerwijs wij van gode gheproeft waren,

4

op dat ons deuangelie betrout worde. Also spreken wi, niet als den menschen behagende, maer gode, die onse herten proeft.

5

⁺Noch wi en hebben noeyet door twoorde der flatteringhen verkeert, also ghy weet, noch door oorsaeck des ghiericheyts. God is tghetuych,

+ B

6

noch soeckende glorie van menschen, noch van v, noch van anderen,

7

nae dien, dat wij mochten wesen v lastich, als apostolen Christi. Maer wy hebben lieflic gheweest int middel van v, ghelijcken als een voester haer kinderen op brengt,

8

alsoo gheneycht zijnde tot v, hebben wij wter herten begheert, v mede te deelen, nyet alleen dat Euangelie Gods, maer oock ons selfs leuen, daer omme dat ghi ons lief geworden zijt.

9

Want ghi ghedenct broeders ons arbeyts ende sweets. Wandt nacht ende dach werkende, om dat wy nyemant van v lastich en souden wesen, hebben wij Deuangelie Gods by v ghepredict.

10

Ghi zijt ghetuygen ende god, hoe heylichlick ende rechtueerdelick ende onschuldelick wi by v, die daer gheloofden, gheconuerseert hebben,

11

ghelikerwijs ghi weet, hoe dat wi tot een yeghelick van v, als een vader tot zijn kinderen:

12

biddende ende vertroostende ende betuygende dat ghi waerdelick voor god wandelen sout, dye v geroepen heeft in zijn rijck ende glorie.

13

⁺Waer om wi ooc god dancken sonder ophouden: dat als ghi van ons ontfanghen hadt dat woort des ghehoors Gods, so hebt ghi dat ontfangen, niet als dwoort der menschen, mer

+ C

[p. M3r]

(alst warachtich is) twoort gods, dye welck werct in v, die daer gelooft hebt.

14

Want broeders ghi zijt nauolgers geworden der kercken Gods, die welck in Iudeen zijn, in Christo Iesu, ⁺ want ghi tselue gheleden hebt van v eyghen maghen, gheliken si vanden Ioden,

+ D

15

welcke oock den heer Iesum ghedoot hebben, ende die propheten, ende ons hebben si veruolcht, ende en behaghen God niet, ende wederstaen alle menschen,

16

verbiedende ons den heydenen te spreken, waer door dat si salich mochten worden, op dat si haer sonden altijt veruullen, ende dye toornicheyt is op haer ghecomen tot int eynde.

17

Mer wi broeders, berooft zijnde van v een wijl tijts na taensicht, mer niet metter herten, so hebben wy seer neerstich geweest v aensicht te sien met grooter begheeren,

18

waer om heb ic willen tot v comen, ic Paulus, ende eens ende weder, ende Sathanas heeft ons weder ghestaen.

19

Want wie is onse hope oft bliscap, oft croone der glorien? en zijt ghijt niet in dye tegenwoordicheyt ons heeren Ihesu Christi in zijn toecoemst?

20

want ghi zijt onse glorie ende blischap.