De Vorsterman Bijbel

[p. M2v]

[afbeelding]

Hier begint dye eerste Epistel dye Sinte Pauwels ghesonden heeft tot dye van Tessalonia.

§ Dat eerste Capittel.

1

⁺PAulus ende Siluanus ende Tymotheus.

⁺ Den kerckene dye tot Tessalonia is, in God onsen vader, ende den Heere Ihesu Christo. Gracie si v ende vrede.

+ A

+ ij.Corin. i. Galat. i. ij.Petri. i.

2

⁺Wi dancken God altijt van allen: uwer gehoochnis hebbende in onse ghebeden, sonder ophouden,

+ B

3

uwer ghedachtich zijnde, om dwerck ws gheloofs ende arbeyts, ende liefde, ende volstandicheyts des hopen ons heeren Iesu Christi, voor God ende onsen vader.

4

Wetende broeders, van God bemindt uwe verkiesinghe,

5

want ons Euangelie is tot v gheweest nyet alleene door twoort, maer oock in crachte ende inden heylighen gheest, ende in veel volheden, ghelijckerwijs ghy weet, hoedanich dat wy onder v gheweest hebben om uwen wille.

6

Ende ghy zijt onse nauolgers gheworden ende des Heeren, dat woort ontfangende, met veel tribulacie, met veel blischap des heylighen gheests.

7

Alsoo dat ghy een forme zijt gheworden, alle den ghelouighen in Macedonien, ende Achaien.

8

Want v ist woordt des Heeren bekent gheworden, niet alleen in Macedonia ende Achaya, maer oock in alle plaetsen is v gheloue in God verbreyt gheweest: also dattet ons niet van noode en is yet te spreken [kolom]

9

Want si vercondighen van v hoedanigen inganck wi tot v ghehadt hebben: ende hoe dat ghi bekeert zijt gheweest tot God, ⁺ van den afgoden, op dat ghi dienen soudt den leuendighen ende warachtighen God,

+ C

10

ende verwachten sinen soon vanden hemelen, Iesum, welcken hy vanden dooden verwect heeft, welck ons verlost heeft van dye toecomende toornicheyt.