De Vorsterman Bijbel

§ Dat .iiij. Capittel.

1

⁺GHi Heren bewijst v knechten rechtuerdicheyt ende ghelijcheyt, wetende dat ghi ooc een Here in dye hemelen hebt.

+ A

2

Sijt stadich int ghebet, waeckende daer in, met danckbaerheyt,

3

biddende te samen oock voor ons, dat God ons dye duer des woordes op doe, ende dat wij spreken moeghen dye verborghentheyt Christi, om welcke ick ooc ghebonden ben,

4

om dat ick dat openbaren soude, ghelijcket van noode is dat ic spreecke.

5

Wandelt wijslijck by die van buyten zijn, den tijt waernemende.

6

Laet alle v woort zijn in gracien, met sout gemenget, op

[p. M2r]

dat ghi weet hoe dat ghi een yeghelic moet antwoorden.

7

Hoe alle dinghen met my staen, sal Tychicus v doen weten, ⁺ dye alder lieste broeder ende getrouwe dienaer ende medeknecht inden heere,

+ B

8

wien ick tot v ghesonden hebbe, hier om op dat hy weten mach hoe dattet met v is, ende vertroosten uwe herten

9

tsamen met Onesimo, den ghetrouwen ende lieuen broeder, welck wt v is, van als sullen si v beduyden, hoe dattet hier staet.

10

Aristarchus mijn mede gheuangen groet v, ende Marcus dye neue van Barnabas van welcken ghi hebt gheboden ontfangen Ist dat hi tot v coemt, ontfanct hem.

11

Ende Ihesus dye ghenoemt wort iustus, welcke wt dye besnijdinghe zijn. Dese zijn alleen mijn hulpers int rijcke Gods, dye my een troost gheweest hebben.

12

Epaphras groet v, welck wt v is een knecht Christi Iesu, altijt sorchfuldich voor v in biddinge, op dat ghy staet volmaect, ende veruult in alle den wille Gods.

13

Want ick gheef hem ghetuych, dat hy veel arbeyts voor v heeft, ende voor die tot Laodicea zijn, ende die te Hierapolim zijn.

14

Lucas die lieue medicijn groet v, ende Demas.

15

Groet die broeders die tot Laodicea zijn, ende Nympham, ende die vergaderinghe die in haer huys is.

16

Ende als den brief van v ghelesen is, soo doet dat si oock van dye kercke in Laodicea ghelesen wert, ende die ghene die van Laodicea is: dat ghy die mede leest.

17

Ende segt Archippo siet, den dienst die ghy inden heer ontfanghen hebt: dat ghy dye volbrenct.

18

Mijn groet met mijn handt Pauli. Ghedenct mijnder banden, dye gracie ons Heren Ihesu Christi si met v allen. Amen.

Ghescreuen te Rome in dye gheuanghenisse ghesonden met den dyaken Tychico ende Onesimo.