De Vorsterman Bijbel

[p. L8v]

[kolom]

[afbeelding]

§ Hier begint die Epistel die Sinte Pauwels ghesonden heuet tot die van Colossis.

§ Dat .i. Capittel.

1

⁺PAulus, Apostel Iesu Christi door die wille Gods, ende Thimotheus broeder.

+ A

2

Den heylighen, die tot Colossis zijn, ende geloouigen broederen in Christo Iesu. Gracie si v, ende vrede, ⁺ van God onsen vader.

+ ij.corint. i. Galata. i. Ephesi. i. Philip. i.

3

Wi dancken God, ende den vader ons heeren Iesu Christi altijt van v, als wi bidden,

4

want wi ghehoort hebben v gheloof in Christo Iesu, ende v liefde tot alle heylighen,

5

om die hope die v ghesedt is, inde hemelen, welck ghi gehoort hebt int woort des waerachticheits des Euangelijs,

6

welc tot v ghecomen is, ghelijcken alst inde heele werelt is, ende vrucht brenghet, ende wast als ooc in v, van dien dach af, dat ghi ghehoort ende bekent hebt die gracie Goods, door de waerheyt,

7

gelijck ghi oock geleert hebt van Epaphra onse lieue mede knecht diewelcke is een getrouwe dienaer Christi Iesu voor v,

8

welc oock ons, geopent heeft uwe liefde inden gheest.

9

Waeromme oock wi, vanden dach aen dat wy dat ghehoordt hadden, wy nyet opghehouden en hebben, voor v te bidden, ende te begheeren, dat ghy veruult mocht worden van die kennisse zijns wils

[p. M1r]

in alle geestelijcke wijsheit ende verstant,

10

op dat ghi waerdelic wandelt, gode in allen behaghende, in alle goede werck vrucht brengende, ende groeyende inde kennisse Gods,

11

met alle cracht gesterct zijnde, na die macht zijnre claerheyt, tot alle verdrachlicheyt ende langmoedicheyt, met bliscap

12

+ danckende god ende den vader, die ons waerdich gemaect heuet totten erfdeel der heyligen int licht.

13

Welcke ons genomen heeft vande macht der duysternissen, ende ouergeuoert int rijck des soons zijnder liefden,

14

door welcken wi verlossinghe hebben, verghiffenis der sonden.

15

Welck is tbeelt des onsienliken gods, die eerste geboren van allen creaturen,

16

want door hem alle dinc gescapen is, inde hemelen ende inde aerde, sienlike ende onsienlike dingen, oft zijn throonen, oft heerscapien, oft machten, al zijnse door hem, ende in hem gescapen,

17

⁺ende hy is voor alle dinck, ende alle dinck blijft door hem staen.

+ C

18

Ende hi is thooft des lichaems des kercks welck is tbeginsel, die eerste geboren wten doden, op dat hi in alle dingen heerscappie houdende si. *

19

Wantet behaghet heeft dat alle volheit des godheyts in hem wonen soude,

20

ende dat alle dinck versoent soude werden, door hem vrede makende door tbloet zijns cruys door den seluen alle dinck, het si inder aerden oft inde hemelen.

21

Ende v die voortijts verureemt waert ende vyanden, na tverstant in quade wercken,

22

nv heeft hy v nochtans versoent int lichaem zijns vleeschs door den doot, op dat hi v stellen soude heylich ende onbeulect, ende onstraffelick in zijn teghenwoordicheyt.

23

⁺Ist anders, dat ghi blijft int gheloof gefundeert, ende stantachtich, ende nyet beweghen en wort vanden hoop des Euangelijs, twelck ghi ghehoort hebt, twelck ghepredict is by allen creatueren dye onder den hemel zijn, van welcken ick Paulus een dienaer gheworden ben.

+ D

24

Nv verblijde ick my van mijnre tribulacien voor v, ende veruulle tgheen datter ontbreect der passien Christi in mijn vleesche voor zijn lichaem, twelck is die kerckene

25

+ Welcs kerckens ic een dienaer geworden ben, na die dispensacie gods, die mi gegeuen is in v, te veruullen twoort Gods,

26

tverborgentheit dat verholen is geweest, van die tijden af ende geslachten. Mer nv ist openbaer geworden sinen heyligen,

27

welcken god heeft bekent willen maken die rijcdom der glorien van deser verholentheyt onder die heydens, dat Chri-[kolom]stus is in v een hoop der glorien,

28

welcken wi vercondigen, straffende alle menschen, ende leerende in alle wijsheyt, op dat wi alle menschen volmaect stellen souden in Christo Iesu.

29

+ Waer toe ic arbeyde oock stridende nae die werckinge des gheens, die in my werct in cracht.