De Vorsterman Bijbel

§ Dat .vi. Capittel.

1

⁺GHi kinderen, weest onderdanich uwen ouders, ⁺ inden heere, want dat is rechtueerdelijck.

+ A

+ Colo. iij.d Eccl. iij.b mat. xix.c. Mar. x.a. Exo. xx.b Collo. ij.d Titum. ij.c. ij.pet. ij.c.

2

Eerdt v vader, ende moeder, dwelck is deerste ghebodt in dye belooftenis,

3

op dat v wel si, ende lanck leuende inder aerden.

4

Ende ghy vaders, en wilt nyet terghen v kinderen tot toornicheyt, maer voetse op door leeringhe, ende straffinghe des heeren.

5

Knechten, weest onderdanich den heeren na den vleesche, met vreese, ende beuinghe, met simpelheyt ws herten, als Christo,

6

Niet na den ooghen dienende, als den menschen begheerende te behaghen, maer als knechten Christi, doende dat god wil, wter herten

7

met goetwillicheyt, als den heere dienende, ende niet den menschen

8

wetende dat een yegelick, tgoet dat hi ghedaen heeft, ontfanghen sal vanden heere, oft hi knecht si, ⁺ oft vry.

+ Roma. ij.a collo. iij.b iacobi. ij.e i.Pet. ij.e

9

Ende ghy heeren, doet dat selue teghen haer, dreygementen latende, wetende dat haer ende v heere, inden hemel is, ende bi hem en is gheen aensien van personen.

10

+ Voort aen mijn broeders, wert sterck ⁺ inden heere, ende door die macht zijns stercheits,

+ B

11

trect aen die wapeninghe Gods, op dat ghy moghet staen teghen dye laghen des duyuels,

12

want ons en is gheenen strijt teghen bloet ende vleesch, maer teghen dye heerschappien, ende machten teghen die heeren des werelts, regeerders deser duysternissen van dese tijt, teghen die gheestelike scalcheden in de hemelsche dinghen.

13

Daer om, neemt aen die wapeninghe Gods, op dat ghi muecht wederstaen inden quaden dach, ende in allen volmaect staen. [kolom]

14

Aldus staet, v lendenen opgeschort zijnde, in die waerheyt, ende aengetoghen met dat pansier des rechtueerdicheyts,

15

ende met die voeten gheschoeyt, in een bereydinge van dat Euangelie des vredes.

16

In allen dinghen nemende den schilt des gheloofs door welck ghy muecht alle dye vierighe gheschutten van die quade wt doen,

17

ende neemt den helm des salicheyts, ende tsweert des geests, ⁺ dwelcke is dat woort Gods. *

+ C

18

In alle smeeken, ⁺ ende verbidden, alle tijt biddende inden gheest, ende in dien wakende met alle stadicheyt ende verbiddinghe voor allen heylighen,

+ i.Tess. ij.b

19

ende voor mi, op dat my twoort gegeuen wort int op doen mijns monts, met vrijheyt bekent te maken dye verborgentheyt des Euangelijs,

20

van welcke ick beueel hebbe inde ketinghen, dat ick daer vri af spreken mach, ghelijct van noode is.

21

Ende op dat ghy weten muecht tghene dat my aengaet wat ick doe, ⁺ van als sal v doen weten Tychicus, dye lyeue broeder, ende getrouwe dienaer inden heere,

+ D

22

den welcken ick daer om tot v gesonden hebbe, om dat ghi weten soudt van onsen dinghen, ende dat hi v herte vertroosten soude.

23

Vrede si den broederen, ende liefde, metten ghelooue van God onsen vader, ende den heere Iesu Christo.

24

Gracie si met v allen dye lief hebbende zijn onsen Heere Iesum Christum, met puerheyt, Amen.

Ghescreuen te Roomen in die geuangenisse, ghesonden tot Ephesien metten Dyaken Tichico.

§ Hier na volcht dye Epistel die de alder weerdichste apostel Paulus heeft ghescreuen tot den Philippensen.