De Vorsterman Bijbel

§ Dat .ij. Capittel.

1

⁺ENde hy heeft v leuendich ghemaect, als ghi doot waert, ouermits den misdaden ende sonden, ⁺

+ A

+ Colloss. ij.

2

in welcken ghy wel eer gewandelt hebt, na den oploop des werelts na den prince, dye welcke dye macht heeft des luchts, die een gheest is, nv inden mistrouwen dye kinderen werckende,

3

onder welcken wi al te samen wel eer gewandelt hebben, in die begeerlicheden ons vleeschs doende den wille des vleeschs ende der gedachten, ende wy waren wt der natueren kinderen des torens, ghelijck oock dye ander.

4

Maer God, dye rijck is in bermherticheyt door zijn groote liefte, door dye welcke hy ons lief gehadt heeft,

5

doen wy doot waren ouermidts die sonden, heeft hy ons leuen-[kolom]dich gemaect, in Christo. Door wiens gracie zijt ghi salich gemaect,

6

⁺ende heeft ons ooc met hem verwect, ende te samen met hem doen sitten, onder de hemelsce in Christo Iesu,

+ B

7

om dat hi in die toecoemende tijden thoonen soude, die groote oueruloedige rijcdommen zijns gracijs, door die minlicheyt tot ons, door Christum Iesum.

8

Want door die gracie zijt ghi salich geworden, door tghelooue ende dat niet wt v. Tis Gods gaue,

9

niet wt den wercken, op niemant en gloriere.

10

Want wi zijn werck zijn, geschapen in Christo Iesu tot ghoede wercken, die welcke God bereyt heeft, om dat wi daer in wandelen souden.

11

Daerom weest ghedachtich, dat ghy voortijts heydens wesende, inden vleesche werdet geheeten onbesneden, van tghene datter gheheeten wort besnidenisse, inden vleesche, welcke met handen geschiet,

12

dat ghi in dien tijden waert sonder Christo, veruremt van die borgherschap van Israel, ⁺ ghasten van die testamenten der beloftenissen, gheen hope hebbende, ende sonder God wesende inde werelt.

+ C

13

Maer nv door Iesum Christum. Ghi die voortijts verde waert, zijt na by gheworden, door dat bloet Christi.

14

Want hi is onse vrede, welcke wt alle beyde een ghemaect heeft, ende heeft wech genomen, dat middel schutsel, ontbindende die vyantschap, in zijn vleesch,

15

de wet der gheboden, die in scriften ghestelt was te niet doende, op dat hi twee tot een mensche scheppen soude, in hem seluen vrede makende,

16

op dat hi God versoenen soude, alle beyde in een lichaem, doort cruys, als hy die viantschap ghedoot hadde, doort cruys in hem seluen. ⁺

+ Luce. xx.

17

Ende comende heeft hi vrede vercondicht, v die verde waert, ende vrede dien die na by waren.

18

Want, wy door hem eenen toeganc hebben alle beyde, in eenen gheest totten vader.

19

+ So en zijt ghi nv gheen ghasten, ende vremde, maer mede burghers der heyligen, ende huysghesin Gods,

20

ghetimmert opt fundament der apostolen, ende propheten, de selfde Iesus Christus, den hoocsteen wesende in welcken,

21

so wat timmeragie daer aen gesedt wort, die wast tot eenen heyligen tempel inden heere.

22

Inden welcken ghi ooc mede ghetimmert werdt, tot een tabernakel Gods inden heylighen gheest. *