De Vorsterman Bijbel

§ Dat .vi. Capittel.

[p. L3v]

1

⁺+ BRoeders, ist datter eenich mensche in sonde gheuallen is, ghy dye gheestelick zijt, helpt dusdanighen, inden gheest des saechtmoedicheyts, v seluen aenmerckende, op dat ghy oock nyet ghetempteert en wort.

+ A

2

Draecht malcanders last, ende alsoo suldy veruullen dye wet Christi.

3

Want ist dat hem yemant laet duncken, dat hy wat is, na dien dat hi niet en is, die verleyt hem seluen. ⁺

+ Roma. xv.

4

Een yeghelijck proeue zijn werck, ende dan sal hy in hem seluen glorieringhe hebben, ende nyet in een ander.

5

Want, een yeghelijck sal zijn eyghen last draghen.

6

⁺Ende die met een woort geleert wort, laet dye mede deylen, van alle goet ghemeen makende den ghenen dye hem leert.

+ B

7

En wilt niet dwalen. God en wort nyet bespot

8

want al dat een mensche saeyen sal, dat sal hy oock mayen. Dye in een vleesch saeyt, ⁺ sal van dat vleesch maeyen corruptien, mer dye inden gheest saeyt, sal vanden gheest dat eewighe leuen mayen.

+ ij.Tessa. iij

9

Ende goet doende, en laet ons niet ghebreken, want wi sullen op sinen tijt maeyen, nyet ghebrekende

10

Hier om als wy tijt hebben, laet ons goet doen tot allen ende aldermeest tot die huysghenooten des gheloofs. *

11

⁺Siet, hoedanigen brieuen ick v ghescreuen hebbe met mijn hant.

+ C

12

Al dye behagen willen naden vleesche, dwinghen v besneden te worden, alleen, op dat si om tcruys Christi gheen veruolghinghe en souden lijden.

13

Want die besneden worden, en houden oock selue die wet nyet, maer si willen dat ghy besneden wort, op dat si in v vleesch glorieren moghen.

14

Maer tmoet verde wesen, dat ick soude glorieren, dan int cruys ons heren Iesu Christi, door welcken mi die werelt ghecruyst is, ende ick der werelt. *

15

⁺Want in Christo Iesu en baet, noch besnijdinge noch onbesnijdinge, maer een nyeuwe creatuere.

+ D

16

Ende alle dye desen reghel volghen, vrede si op haer, ende barmherticheyt, ende op Israel Gods.

17

Voortaen, en si my nyemant moeyelick, want ick de litteekenen ons heeren Iesu Christi, draghe in minen lichaem.

18

Die gracie ons heeren Iesu Christi, si met uwen gheest, broeders in Christo Amen.

§ Ghescreuen te Rome, ende gheson tot de Galaten.