De Vorsterman Bijbel

§ Dat .v. Capittel.

1

⁺STaet, ende en wilt nyet weder gehouden worden metten iock des eyghendoms.

+ A

2

Siet, ick Paulus segghe v, ist dat ghy besneden wort, ⁺ Christus en sal v nyet baten.

+ Actuum. xv.

3

Ende ick betuyge alle mensche die hem seluen besnidet, dat hi schuldich is die geheele wet te houden.

4

Ghy zijt af geuallen van Christo, die in die wet gherechtueerdicht wordt, zijt van die gracie gheuallen

5

want wi door den gheest wtet geloof, de hope des rechtueerdicheyts verwachten.

6

Want in Christo Iesu, noch die besnidinge en helpt nyet, noch [kolom] onbesnidinge, maer tgheloof door die liefde werckende. ⁺

+ i.corint. v.

7

Ghy liept wel, wie heeft v betoouert, der waerheyt nyet onderdanich te zijn?

8

Seker dit onderwijs en is niet vanden ghenen die v roept.

9

Een weinich suerdeech versuert den heelen hoop.

10

⁺+ Ic betrou van v inden heere, dat ghi anders niet geuoelen en sult. Maer die v verstoort, die sal doordeel draghen, wie dat hi si.

+ B

11

Ende broeders, ist dat ick noch die besnidenis predike, wat lide ick noch veruolginghe? Aldus, so is die scandalisacie des cruys te niet,

12

Och oft si afghesneden werden, die v verstooren,

13

Want broeders, ghi zijt tot vriheyt gheroepen, alleen die vriheyt nyet en gheeft, tot een oorsaeck den vleesch. Maer dient malcanderen, ⁺ door die liefte des ghests

+ Leuiti. xix. Mat. xxij. Marci. x Luce. x. Roma. xiij

14

Want al die wet, in een woort veruult wort als in dat, Hebt lief v naeste, ghelijc v seluen.

15

Ist dat ghi malcanderen bijtet ende etet siet dat ghi niet van malcanderen opgegeten en wort.

16

⁺Ende ick segghe in Christo, + Wandelt inden gheest, ende die begheerlicheyt des vleesch en sult ghi niet volbrenghen.

+ C

17

Wantet vleesch begheert teghen den gheest, ⁺ ende die gheest teghen tvleesch. Dese zijn teghen malcanderen, dat ghi tselfde nyet en muecht doen dat ghi wilt.

+ Roma. xiij

18

Ende ist dat ghi door den gheest gheleyt wordet, so en zijt ghi niet onder die wet.

19

Voort, die wercken des vleeschs zijn openbaer, welcke zijn dese, ⁺ Oncuyscheit onreynicheyt, onschamelheyt, vleeschelicheyt,

+ ij.corin. xij

20

der afgoden dienst, venijn te gheuen viantschap, kiuagie, nidicheden, toornicheden, scheldinghen, oploopingen, verscheydinghen,

21

haticheden, dootslaghen, dronckenschappen, brasserien, ende deser ghelijc ⁺ Van welcken ick v te voren segghe, als ick oock voor gheseyt hebbe, dat die soodanighe dinghen doen, en sullen dat rijck gods niet vercrighen. ⁺

+ D

+ Apo. xxij.

22

Wederom, die vrucht des gheests is liefte, vrolicheit, vrede, lijdsaemheyt, lancmoedicheyt, vriendelicheyt, goetheyt,

23

ghelooue, saechtmoedicheyt, maticheyt, abstinencie, suyuerheyt, teghen soodanighe en is dye wet nyet.

24

Dye Christo toebehooren, hebben haer vleesch ghecruyst metten sonden, ⁺ ende begheerlicheden.

+ i.Petri. ij.

25

Ist dat wy door den gheest leuen, laet ons oock nae den gheest wandelen.

26

Laet ons nyet begheerich zijn nae ydel glorie, malcanderen terghende, malcanderen hatende.