De Vorsterman Bijbel

§ Dat .vi. Capittel.

1

⁺MEde helpende, bidden wi dat ghi de gracie Gods niet te vergeefs en ontfanct.

+ A

2

Want hy seyt Inden bequamen tijt heb ick v verhoort. Ende inden dach des salicheyts, heb ick v gheholpen. Siet nv eenen bequamen tijt, siet nv den dach des salicheyts,

3

geuende nyemanden eenighe argernis, op dat onsen dienst nyet verwmaedt en wert,

4

maer in allen dinghen laet ons ons seluen thonen, als Gods dienaers.

⁺ In veel lijtsaemheyts, in tribulacien, in nootdrufticheden, in benautheden,

+ B

5

in slaghen, in gheuanckenissen, in oplopinge, in arbeyden, in makinghe, in vasten,

6

in puerheyt, in wetentheyt, in lanckmoedicheyt, in goedertierenheyt, inden heylighen gheest, in ongheueynsder liefde,

7

int woort des waerheyts, in die macht gods. Doer die wapenen des rechtueerdicheyts, ter rechter siden ende ter slincker siden,

8

door glorie ende scande, door quade fame ende goede fame, als bedriegers, ende nochtans warachtich, als onbekende, ende nochtans bekende,

9

als steruende, ende siet wi leuen, als gestraft zijnde, ende niet gedodet,

10

als droeuich wesende ende nochtans altijt verblidende, als arm, nochtans veel rijck makende, also niet hebbende, ende alle dinck besittende. *

11

⁺O ghi van Corinthen, mijnen mont is tot v open ons herte is verbreyt.

+ C

12

En zijt niet benaut in ons, mer zijt benaut in v inwendige leden,

13

ende de selfde loninge hebbende, seg ic v als kinder: wert oec verbreyt.

14

+ En wilt gheen iock leyden met den ongelouigen. Want wat gemeenschap is de rechtuerdicheyt met dye onrechtuerdicheyt? Oft wat gemeenscap tlicht met de duysternisse?

15

oft wat ouereencomen is Cristo met Belial? oft wat deel is den gelouigen metten ongelouigen?

16

oft wat coemt den tempel gods, met den afgoden ouer een? ⁺ Ghy zijt den tempel des leuenden gods, gelikerwijs god geseyt heeft. Ick sal onder haer woonen, ende onder haer wandelen, ende ick sal haer God wesen ende si sullen mijn volck wesen.

+ i.Cor. iij.d ende .vi.d. Leui. xxvi.

17

Daer om gaet wt dat middel van haer, ende wort van haer verscheyden, ⁺ seyt dye Heere ende en raect nyet dat onreyn is,

+ Esa. xxv.c Iere. iij.a.

18

ende ick sal v ontfangen ende ick sal v wesen tot een vader, ende ghy [kolom] sult my wesen tot sonen ende dochteren, seyt dye almachtighe here.