De Vorsterman Bijbel

§ Dat .v. Capittel.

1

⁺WAnt wi weten: ist dat ons aertsche huys deser wonincs ontbonden wert, so hebben wi een timmeragie wt god, een huysinghe, nyet met handen gemaect, maer eewich inde hemelen.

+ A

2

Want daer toe versuchten wy [kolom] met onse woeninge, dwelcke vanden hemel is, begheerende ouerghecleet te worden.

3

Ist nochtans, dat wy ghecleet ende nyet naect gheuonden worden:

4

want wy die in desen tabernakel zijn, suchten, belast wesende, daer om: dat wi niet en willen ontcleet wesen, mer daer en bouen ghecleet worden, op dat die sterflicheyt verslonden wert vant leuen,

5

ende dye ons daer toe bereyt heeft, dat is god, dye welcke ons een pant des gheests ghegheuen heeft.

6

⁺Hier omme altijt koen, ende wetende, dat also lange als wi inden lichaem thuys zijn, soe zijn wi vreemt vanden here,

+ B

7

want wi wandelen door tgeloof, niet door die gedaente.

8

Wi verkoenen ons, ende hebben eenen goeden wille vreemt te wesen vanden lichaem, ende teghenwoordich te wesen biden here,

9

waer omme arbeyden wi, tsi tegenwoordich oft nyet tegenwoordich, hem te behagen.

10

Want wi moeten al geopenbaert worden voor den rechter stoel Christi, op dat een yegelicken wech draghen mach, na tgheen dat hy gedaen heeft in zijn lichaem, ⁺ het si goet oft quaet.

+ Rom. xiiij.

11

Daer omme die vreese des heeren wetende, so raden wy den menschen, maer God zijn wi openbaer ende ick hope dat wi oeck in uwe consciencien openbaer zijn. *

12

⁺Wy en commenderen weder ons niet tot v mer wi geuen v een oersaec van ons te glorieren, op dat ghy wat hebt tegen den ghenen dye int aensicht glorieren, ende nyet int herte.

+ C

13

Want het si dat wi metter herten te bouen gaen gode: ofte het si dat wy sober zijn, v lieden:

14

Want dye liefde Christi dwinct ons dat meynende, is datter een voor allen ghestoruen is, daer om zijn si alle gader ghestoruen.

15

Ende Christus is voor allen gestoruen, op dat dye leuen, hem seluen nyet en leuen. Maer den ghenen, die voor haer ghestoruen, ende verresen is.

16

⁺Aldus en kennen wi hier nae nyemant naden vleesche, ende al ist dat wi Christum naden vleesche gekent hebben, nochtans nv en bekennen wi hem so nyet meer.

+ D

17

⁺ Aldus isser yemant in Christo een nyeu creatuer, die oude zijn voorby gegaen. Siet, tis al nyeu geworden,

+ Esa. 43.c Apo. xxi.e

18

ende alle dinck is wt god, die ons hem seluen versoent heeft door Christum, ende heeft ons den dienst des versoenincs ghegeuen.

19

Want God was in Christo, dye werelt versoenende, haer nyet oplegghende haer sonden, ende heeft in ons ghesedt twoort des versoeninghe.

20

Aldus so hebben wi nv tbeuel van Christus

[p. K6v]

wegen, als god v door ons vermanende, so bidden wi door Christo, wert God versoent.

21

Want den ghenen die gheen sonde gekent en heeft, heeft hi voor ons sonde ghemaect, op dat wi Gods rechtuaerdicheyt souden worden in hem.