De Vorsterman Bijbel

§ Dat .iiij. Capittel.

1

⁺DAer om hebbende desen dienst, na den welcken wy bermherticheyt vercreghen hebben, so en gebreken wi nyet,

+ A

2

maer wi verwerpen die heymelicheden der scanden nyet wandelende door loosheyt noch dwoort gods verualschende, maer door openbaringhe des waerheyts ons seluen commenderende by alle consciencien der menschen, in die teghenwoordicheyt gods.

[p. K6r]

3

Ende ist dat ons Euangelium bedect is: inden ghenen die vergaen is bedect,

4

inden welcken die god van dese werelt, den sinnen der onghelouigen verblint heeft, op dat haer niet schinen en soude dat licht des Euangelijs des glorie Christi, welcke is dat beelde gods.

5

⁺+ Want wy en preken ons seluen nyet, mer onsen heere Christum Iesum, ⁺ ende wy predicken ons v knechten om Iesus wille.

+ B

+ Gene. i.

6

Want God is dye gheboden heeft dattet licht wt dye duysternisse schinen soude, twelck in v herten gheschenen heeft, tot een verlichtinghe der kennisse van die glorie gods, int aensicht Iesu Christi.

7

⁺Wy hebben desen schat in aerden vaetkens op dat die hoocheyt des crachts van god si ende niet wt ons.

+ C

8

In allen dinghen liden wi tribulacie: mer wi en werden niet benaut. Wi arbeyden, ende en worden niet vermoeyt.

9

Wi liden veruolginge, mer wi en werden niet verlaten. Wi werden verootmoedicht, mer wi en worden niet bescaemt. Wi worden verworpen, mer wi en vergaen niet.

10

Altijt dye doodinge des heeren Iesu Christi, int lichaem om dragende, op dattet leuen Iesu, oock in ons lichaem geopenbaert mach worden. *

11

⁺Want wi die leuen, werden altoos geleuert inden doot, om Iesus wille, op dattet leuen Iesu geopenbaert wert in ons sterflijc vleesch.

+ D

12

Aldus werct dye doot in ons, mer dleuen in v.

13

Voort hebbende den seluen gheest des geloofs nae datter ghescreuen is. ⁺ Ick heb gelooft, ende daer om heb ick ghesproken.

+ psal. c.xv.

14

Ende wy gelouen waer omme wi oock spreken wetende, dat dye ghene die Iesum verwect heeft, ons oock verwecken sal met Iesu, ende met v setten sal.

15

Want alle dingen zijn om v, op dat dye oueruloedighe gracie van vele, oock oueruloeye in dancksegghinghen, totter glorien gods.

16

Waer om wy oock nyet en vergaen, maer al ist dat onsen wtwendighen mensch vergaet, die inwendighe wert nochtans van daghe te daghe vernieuwet.

17

Want ons tribulacye die tijtlick ende licht is, werct een eewige bouenmatige heerlicheyt in ons,

18

die niet en sien opt gheen dat sienlic is, maer opt gheen datmen niet en siet. Want datter ghesien wert, is tijtlick maer datter niet gesien en wert eewich.