De Vorsterman Bijbel

§ Dat .v. Capittel.

1

⁺MEn hoort gheheel onder v oncuysheit ende sulcke onsuuerheyt, dye niet onder den Heydenen, als dat yemant zijns vaders huysurouwe heeft.

+ A

2

Ende ghi zijt opgeblasen, ende hebt nyet lieuer droeffenis gehadt, dat hy ghenomen soude worden wt dat midden van v, die dit werck bedreuen heeft

3

Ick als nyet teghenwoordich inden lichaem: maer teghenwoordich inden gheest, heb nv gheoordeelt als teghenwoordich, dat dye ghene dye dyt alsoe bedreuen heeft,

4

inden name ons heeren Ihesu Christi, van v te samen vergadert zijnde, ende minen gheest te samen, met die macht ons heeren Iesu Christi,

5

ouergheleuert worde den duuel, totten doot des vleeschs, op dat die gheest behouden si inden daghe ons Heeren Iesu Christi.

6

⁺V gloriacy en is nyet goet. En weet ghy nyet dat een luttel deesems dat gheheel deech versuert.

+ B

7

+ Reynicht den ouden deesem, dat ghi een nyeu menghinge moecht zijn, gelijc als ghi onghedeesemt zijt. Want oec ons paesschen is Christus gheoffert.

8

Aldus laet ons waerschappen, niet inden ouden deesem, noch inden deesem der quaetheyt, ende der schalcheyt, maer in ongedeesemde broden, der puerheyt ende waerachticheyt. *

9

⁺Ic heb v gescreuen door eenen brief, dat ghi nyet versamen en soudt metten oncuysschen

+ C

10

Ende nyet metten oncuysschen des werelts oft met den ghierighen, oft metten rouers, oft met den dienaers der afgoden. Anders soudt ghy wtgegaen zijn van deser werelt.

11

Maer nv heb ick v ghescreuen, dat ghy v daer mede nyet en versamet. Is daer yemant onder v die een broeder ghenoemt wort, oncuysch, oft ghierich, ofte een dienaer der afgoden, oft een quaetspreker, oft een dronc-[kolom]kaert, ofte een roeuer: met dusdanighen en wilt oeck nyet eten.

12

Want wat gaet dat my aen van den ghenen die buyten zijn te ordelen? Oordelt ghi niet vanden ghenen dye binnen zijn?

13

maer die ghene die buyten zijn, sal god oordeelen. Neemt dat quaet wech wt v seluen.