De Vorsterman Bijbel

§ Dat .iiij. Capittel.

1

⁺+ ALso achte ons dye mensche: als dienaers Christi, ende wtdeylders der diensten gods.

+ A

2

Ende voorts soectmen onder die wtdeylders datter yemant trou werde gheuonden.

3

Het is my voor tminste, dat ick van v geoordeelt worde, oft vanden menschelike dage. Immer ick en ordeele my seluen niet,

4

want ick en ken mi seluen gheens dincs sculdich, mer daer in en ben ick niet gerechtuerdicht. Voort, die mi oordeelt, dat is die here.

5

Daer om en wilt niet voor den tijt ordelen, tot dat die here come, de oec verlichten sal de verborgentheden der duysternissen ende sal openbaren die raden der herten. Ende dan sal eenen yegeliken lof zijn van gode. *

6

⁺Ende broeders, dit heb ick doer een gelikenis tot mi seluen ende tot Apollo getoghen om uwent wille, op dat ghi in ons sout leeren, dat nyemant bouen datter gescreuen is, deen tegen den anderen wert opgeblasen bouen den anderen.

+ B

7

Want wie onderscheit v? ende wat hebt ghi dat ghy nyet en hebt ontfanghen? Ende ist dat ghijt hebt ontfanghen: wat glorieert ghi oft ghijt nyet ontfangen en hadt?

8

Ghi zijt nv versadicht, ghi zijt nv rijck gemaect: sonder ons regneert ghy. Ende och oft ghy regneerde, op dat wij te samen oeck met v regneerden.

9

⁺Want ick meen dat god ons die alre leste Apostelen ghetoont heeft, als die gheen dye ter doot geschict zijn. Wi zijn een sietspel geworden der werelt, den enghelen, ende den menschen.

+ C

10

Wij zijn sodt om Christus wille, maer ghy zijt wijs in Christo. Wi zijn cranck maer ghi staet, ghi zijt edel, maer wi onedel

11

Tot deser vren toe hongheren ende dorsten wij, ende zijn naect, ende werden met vuysten gheslagen, ende hebben gheen seker stede,

12

ende arbeyden, werckende met onsen handen: wij werden veruolect, ende wij gebenedijen, Wij lijden veruolghinge, ende wi verdragen

13

Wij worden gheblasphemeert, ende wi bidden. Wij zijn geworden als vuylnis van deser werelt, alder menschen verworpsel tot desen daghe toe.

14

Ick en scriue dit niet om v te beschamen maer ick vermane v als mijn alder liefste kinderen.

15

Want al waert dat ghi hadt thien dusent meesters in Christo, nochtans nyet veel vaderen. Want ick heb v in Christo Iesu doer dat euangelium gewonnen.

16

Aldus bid ick v, dat ghi mijn nauolgers wilt zijn, gelijc ick

[p. I8r]

Christus nauolger ben.

17

Om deser saken wille heb ick v ghesonden Timotheum, ⁺ die mijn alder liefste soon is, ende ghetrouwe inden heere, die v sal inder gehoochnisse brenghen mijn weghen, die in Christo Iesu zijn, gheliken ick tot allen plaetsen in die kercken leere

+ D

18

Die somige zijn opgeblasen, gelijc oft ic tot v nyet comen en soude.

19

Ic sal corts tot v comen ist dat die heere wil, ende sal bekennen niet dye woorden der gheenre dye opgeblasen zijn, maer die cracht.

20

Want inden woorden en is dat rijck gods niet, maer inde cracht.

21

Wat wilt ghy? dat ick comen sal tot v met een roede, oft met liefden, ende eenen gheest des sachtmoedicheyts?