De Vorsterman Bijbel

§ Dat .ij. Capittel.

1

⁺ENde broeders doen ick tot v was gecomen, en ben ick niet gecomen in hoocheit des woorts oft der wijsheyt, vercondigende v die getuychnisse Christi,

+ A

2

Want ic en hebbe mi niet wt gegeuen, te weten onder v, dan Iesum Christum, ende dien gecruyst.

3

Ende ick heb in crancheyt, ende in sorgen, ende in veel vreesen by v gheweest,

4

ende mijn woorden, ende mijn predicatie, en was niet in wijs makende woorden der menscheliker wijsheyt, maer in vertooninge des gheests, ende des crachts,

5

op dat v geloue niet en si in wijsheyt der menschen, maer in die cracht gods.

6

Ende wijsheyt spreken wi onder die volmaecten, maer wijsheyt nyet des werelts, noch oeck der princen van dese werelt, welcke verdoruen worden.

7

⁺Maer wi spreken gods wijsheyt in verborgentheyt, die verborgen is, dye god te voren geordineert hadde voor die werelt tot onser glorien,

+ B

8

welcke nyemant vanden princen deser werelt bekent heeft. Want hadden si die bekent, si en hadden den coninck der glorien noeyt ghecruyst.

9

Gheliken als ghescreuen is, ⁺ dattet ooge niet ghesien en heeft, ende oor niet gehoort en heeft, ende in des menschen herten niet op geclommen en is, dat God bereyt heeft die hem liefhebbende zijn.

+ Esa. iiij.b.

10

⁺Maer ons heuet God geopenbaert door zijnen gheest. Want die gheest ondersoect alle dinck, oec die diepheden gods.

+ C

11

Want wie vanden menschen weet, dat ghene dat des menschen is, dan die gheest des menschen die in hem is? Alsoe oeck dye dinghen die van god zijn, en weet nyemant dan die gheest gods.

12

Mer wi en hebben nyet ontfangen den gheest des werelts, mer den geest die wt god is, op dat wij weten mogen die dingen die ons van god gegeuen zijn,

13

die wi oec spreken, niet met gheleerde woorden des menscheliken wijsheyts, maer in leeringe des geests, gelikende gheestelike dingen, bi geestelike.

14

Want een sinlick mensche en verstaet nyet dat van die gheest gods is, want het is hem sotticheit: noch hi en cans niet verstaen, daer om dattet geesteliken geordeelt wort.

15

Mer een geestelick oordeelt alle dinck, hi en wort van nyemant geoordelt, alser ghescreuen is.

16

Want wie heeft den sinne des heren bekent? ⁺ oft wie heeft hem geleert? Wi hebben den sin Christi.

+ Esaie. xl.