De Vorsterman Bijbel

[p. I6v]

[kolom]

[afbeelding]

Hier beghint die eerste Epistel die sinte Pauwels gescreuen heeft tot die van Corinthien.

§ Dat eerste Capittel

1

⁺PAulus geroepen Apostel Iesu Christi door den wille gods, ende Sosthenes broeder,

+ A

2

der kercken gods die totten Corinthien is.

Den gheheylichden door Christum Iesum: den geroepen heyligen, tsamen met allen den ghenen die aenroepen den naem ons heeren Iesu Christi, in alle plaetse het si hare oft onser.

3

Gracie, ende vrede, si v van God onsen vader, ende den heere Iesu Christo.

4

⁺ + Ic danc minen god altijt voor v, van dye gracie gods, die v ghegeuen is door Iesum Christum,

+ B

5

dat ghi in allen dingen rijc geworden zijt in hem in alle woorden, ende in alle kennisse,

6

ghelijckerwijs dat getuych Iesu Cristi geuesticht heeft geweest in v,

7

also dat v niet en gebreect in eenighe gracy, verwachtende die openbaringe ons heeren Iesu Christi,

8

die v oock vestigen sal ten eynde toe sonder misdaet, inden dage des toecoemst ons heeren Iesu Christi. *

9

God is ghetrou, door wien ghy gheroepen zijt in dat gheselschap zijns soons Iesu Christi ons heeren.

10

Ende ick bid v broeders, door den naem ons heren Iesu Christi: dat ghi al tsamen tselfde wilt spreken ende dat daer gheen twisten onder v en zijn. Maer zijt volmaect in eenen sin ende in eender wetinghen.

11

Want mijn broeders

[p. I7r]

my is te kennen gegeuen van v, vanden geselscap Chloes, datter twisten zijn onder v.

12

Ende ic seg, dat welcke een yegelic onder v seyt. Ick ben Pauli, ende ick Apollo, ende ic Cephe, ende ick Christi.

13

Is Christus gedeelt? Is Paulus voor v ghecruyst? oft sidi in Paulus naem ghedoopt?

14

Ick danc god dat ick nyemant van v gedoopt en heb dan Crispum ende Gaium:

15

op dat niemant en segge, dat ghy in minen naem gedoopt zijt.

16

Ende ic heb oec gedoopt Steuens huysgesin. Hier en bouen en weet ick niet, oft ick yemant anders gedoopt hebbe.

17

⁺Want Christus en heeft mi nyet gesonden om te doopen, maer om te vercondigen dat Euangelium. Niet in wijsheyt der woorden, op dattet cruys Christi niet ydel ghemaect en worde.

+ C

18

Want die woorden des cruys zijn den genen die verloren worden dwaesheyt: mer ons die welcke salicheyt vercrijghen, ist Gods macht.

19

Want daer is ghescreuen. Ick sal vernielen die wijsheyt der wijsen, ende verworpen dat verstant der verstandighen.

20

Waer is dye wijse? Waer is die scribe? Waer is die ondersoecker deser werelt? ⁺ Heuet God nyet dwaes ghemaect dye wijsheyt deser werelt?

+ Esa. xxix a Esaie. 33.c.

21

⁺Want na dat in die wijsheyt gods, die werelt door die wijsheit god niet bekent en heeft heeftet god goet gedocht door die dwaesheit der predicatien salich te maken die gheloouende.

+ D

22

Want die Ioden begeeren teekenen, ende die Griecken soecken wijsheyt.

23

Mer wij prediken Christum ghecruyst, den Ioden een scandalizacie, ende den Heydenen een sotheyt,

24

maer den geroepen Ioden ende Griecken, Christum gods mogentheyt, ende gods wijsheyt.

25

Want dat god dwaesheyt is, dat is wijser dan die menschen. Ende dat cranc is voor god: dat is stercker dan die menschen.

26

⁺Want broeders, siet uwen roep, want daer niet veel wijsen naden vleesch, niet veel machtige, niet veel edele,

+ E

27

maer dat dwaes is nader werelt heeft god vercoren, op dat hy bescamen soude die wijsen. Ende die cranc waren in die werelt, heeft god vercoren, op dat hy beschamen soude die welcke sterck zijn.

28

Ende dye onedel waren, ende versmaet in dye werelt, heeft god vercoren, ende dat niet was, op dat hy soude verderuen die dingen dye zijn,

29

op dat nyet alle vleesch en soude glorieren.

30

Ende wt den seluen zijt ghi in Christo Iesu, dye ons gheworden is wijsheyt van god ende rechtuerdicheit, ende heylichmakinghe, ende verlossinge.

31

Op dat gelijck gescreuen [kolom] is. ⁺ Die glorieer, glorieere in den heere.

+ Iere. ix.g.